Bu dünyada bəzi günlər var ki, sadəcə təqvimdə yer tutmur — millətin yaddaşına, ruhuna, taleyinə hopur. 31 Dekabr – Dünya Azərbaycanlılarının Həmrəyliyi Günü məhz belə günlərdəndir. Hər il dekabrın sonuncu günü nəinki Yeni ilin nəfəsi, həm də dünyanın dörd bir yanına səpələnmiş milyonlarla soydaşımızın bir ürək kimi döyünməsi deməkdir. Bu gün bizi bir-birimizə bağlayan görünməz, lakin sarsılmaz tellərin möhkəmləndiyi gündür.

Bu sözləri aia.az-a açıqlamasında Eltun Süleymanov deyib.

Müsahibimiz deyib ki, bu ideyanın memarı Ulu Öndər Heydər Əliyevdir. O, sovet siyasi sisteminin sərt çərçivələri içində belə xalqına qolaçan düşüncələr bəxş etməyi bacarmış nadir liderlərdəndir. Hələ o illərdə azərbaycanlıların dünyada birliyini, mənəvi həmrəyliyini formalaşdırmaq kimi böyük bir ideya ortaya qoymaq sıradan məsələ deyildi. Ulu Öndər deyirdi: “Azərbaycanlıları birləşdirən ən böyük güc onların milli kimliyidir. Bu kimlik bizi dünyanın istənilən guşəsində bir ailə kimi saxlayır.” Bu sözlər sadəcə çağırış deyildi — tarixə çevriləcək bir yol xəritəsi idi. 1997-ci ildə keçirilən Dünya Azərbaycanlılarının I Qurultayı ilə bu yolun ilk böyük addımı atıldı. Azərbaycan ilk dəfə öz diasporunun potensialını bir məclisdə görməyi bacardı, dünyaya göstərdi ki, bu xalqın gücü coğrafiya ilə ölçülmür. Bu gün isə həmrəylik anlayışı təkcə sentimental bir duyğu deyil. Cənab Prezident İlham Əliyevin siyasətində bu dəyər milli gücün strateji komponentinə çevrilib. Bütöv Azərbaycanın ideyası, Vətən müharibəsində qazanılan tarixi Zəfər, Qarabağın dirçəlişi, Azərbaycanın beynəlxalq nüfuzunun artması — bütün bunların arxasında həmrəylik düşüncəsinin çağdaş forması dayanır. Cənab Prezident İlham Əliyev bu missiyanı belə ifadə etmişdir: “Birliyimiz gücümüzdür, gücümüz isə həm milli ideyadan, həm dövlətimizə bağlılıqdan gəlir.” Vətən müharibəsi zamanı dünyanın müxtəlif ölkələrində yaşayan soydaşlarımızın göstərdiyi həmrəylik, informasiya cəbhəsində sərgilədiyi qətiyyət, Azərbaycan ordusuna və dövlətinə verdiyi dəstək artıq tarixə yazılıb. Bu gün həmin birlik təkcə emosional bağlılıq yox, Azərbaycan diplomatiyasının, diaspor siyasətinin əsas dayağıdır. Diaspor Komitəsinin fəaliyyəti, yeni Azərbaycan evlərinin dünyanın müxtəlif şəhərlərində açılması, gənclərin diaspor hərəkatına qoşulması — bütün bunlar həmrəyliyin artıq dövlət səviyyəsində idarə olunan bir sistem olduğunu göstərir. Bu günün ən böyük mənası ondadır ki, harada yaşamasından asılı olmayaraq hər bir azərbaycanlı Vətənə bağlılığını yenidən təsdiq edir. Parisdə, Berlində, Vaşinqtonda, Moskvada, İstanbulda — hər yerdə eyni bayraq, eyni dil, eyni yaddaş, eyni taleyə bağlılıq var. Azərbaycan bugün dünyanın ən geniş yayılmış diasporlarından birinə malikdir və bu geniş üfüqlü mənəvi xəritə bizi digər millətlərdən fərqləndirən üstünlüklərdən biridir. Bizi bu birliyə gətirən səbəblər çoxdur. Tarixi köklərimiz, dilimiz, torpağa olan sevgimiz, ən əsası Azərbaycan adıdır. Məhz buna görə Ulu Öndər Heydər Əliyevin dediyi sözlər bu gün də canlıdır: “Azərbaycançılıq ideyası bütün azərbaycanlıları birləşdirən mənəvi gücdür.” Bu gün o güc cənab Prezident İlham Əliyevin siyasi liderliyində daha da möhkəmlənərək yeni mənalar qazanıb. Artıq Azərbaycan brendi beynəlxalq aləmdə özünü doğruldan, dünya siyasətində çəkisi olan bir dəyərə çevrilib. Həmrəylik anlayışı isə bu brendin ideoloji təməllərindən biridir. Vətən müharibəsində qazanılan tarixi Qələbə həmrəylik anlayışını daha da qüvvətləndirən milli psixoloji yüksəliş yaratdı. Bu gün Azərbaycan yalnız bir dövlət kimi deyil, həm də bir ideya kimi güclüdür. Bu ideya — torpağın azadlığı, milli birliyin möhkəmlənməsi, vətən sevgisinin ali dəyər kimi yaşadılmasıdır. Cənab Prezident İlham Əliyevin dediyi kimi: “Azərbaycan xalqı bir yumruq kimi birləşəndə heç bir qüvvə bizim qarşımızda dura bilməz.” Bu yumruq birləşmənin, həmrəyliyin, milli iradənin simvoludur. 31 Dekabr isə həmin yumruğun sönməz işığının bayramıdır.

Bu bayram bizi yalnız keçmişimizlə yox, həm də gələcəyimizlə bağlayır. XXI əsrdə milli həmrəylik dövlətimizin gücünün təməlidir, milli ideologiyanın daşıyıcısıdır, gələcək nəsillərə çatdırılması vacib olan mənəvi irsdir, Azərbaycanın dünya arenasında mövqeyini möhkəmləndirən strateji dəyərdir. 31 Dekabr bu mənada sadəcə bayram günü deyil — Azərbaycanın böyük mənəvi xəritəsinin ən parlaq nöqtəsidir. Bir milləti dünyanın hər yerində eyni ideyaya bağlayan bayramdır-deyə E. Süleymanov fikrini tamamlayıb.