Prezident İlham Əliyevin Bakıda keçirilən Ümumdünya Şəhərsalma Forumunun 13-cü Sessiyasında etdiyi çıxış Azərbaycanın şəhərsalma, memarlıq və davamlı inkişaf sahəsində əldə etdiyi uğurları bir daha nümayiş etdirdi. Çıxış zamanı dövlət başçısı Azərbaycanın qədim tarixə və zəngin memarlıq irsinə malik olduğunu vurğuladı. O bildirdi ki, ölkəmiz təkcə musiqisi və ədəbiyyatı ilə deyil, həm də özünəməxsus memarlıq nümunələri ilə dünyada tanınır. Bakı şəhəri və Azərbaycanın digər qədim yaşayış məntəqələri milli memarlığın inkişafını əks etdirən mühüm mədəniyyət mərkəzləridir

Forumda diqqət çəkən əsas məsələlərdən biri Qarabağ və Şərqi Zəngəzurun yenidən qurulması oldu. Prezident İlham Əliyev qeyd etdi ki, hazırda hökumətin qarşısında duran əsas vəzifələrdən biri həmin ərazilərin müasir standartlara uyğun şəkildə bərpasıdır. Böyük Qayıdış Proqramı çərçivəsində şəhər və kəndlərin baş planları hazırlanır, yeni yaşayış məntəqələri salınır və müasir infrastruktur qurulur. Bu layihələr insanların doğma torpaqlarına təhlükəsiz və rahat şəkildə qayıtmasını təmin etməyə xidmət edir.

Prezident həmçinin Azərbaycanın coğrafi mövqeyinə də toxunaraq bildirdi ki, ölkəmiz tarix boyu Şərqlə Qərbin qovuşduğu mühüm məkan olub. Bu mövqe Azərbaycanın iqtisadi və mədəni inkişafında mühüm rol oynayır. Eyni zamanda, ölkədə ətraf mühitin qorunması və ekoloji tarazlığın saxlanılması istiqamətində böyük işlərin görüldüyü vurğulandı. 2026-cı ilin “Şəhərsalma və Memarlıq İli” elan olunması isə bu sahəyə verilən xüsusi önəmin göstəricisidir. Ümumdünya Şəhərsalma Forumunda səsləndirilən fikirlər Azərbaycanın gələcək inkişaf strategiyasının əsas istiqamətlərini əks etdirir.

Zabrat qəsəbəsi, 81 nömrəli tam orta ümumtəhsil məktəbinin

Tarix müəllimi Arzu Abbasova