1920-ci ildə Azərbaycan Xalq Cümhuriyyəti süqut etsə də, xalqımız müstəqillik arzusundan heç vaxt vaz keçmədi. XX əsrin sonlarında Azərbaycan yenidən öz dövlət müstəqilliyini bərpa etdi. Həmin dövrdə ölkəmizin qarşısında duran çətinliklərin aradan qaldırılmasında Ulu Öndər Heydər Əliyevin xidmətləri danılmazdır. Onun “Müstəqilliyi qorumaq onu əldə etməkdən qat-qat çətindir” fikri bu gün də böyük məna daşıyır.

Azərbaycan Xalq Cümhuriyyətinin qəbul etdiyi İstiqlal Bəyannaməsi xalqımızın milli ruhunun daha da güclənməsinə səbəb oldu. Cəmi 23 ay fəaliyyət göstərməsinə baxmayaraq, Cümhuriyyət dövründə mühüm işlər görüldü. Parlament yaradıldı, dövlət bayrağı təsis edildi, milli ordu formalaşdırıldı, təhsil və mədəniyyət sahəsində mühüm addımlar atıldı. Ana dilində tədrisin həyata keçirilməsi və Bakı Dövlət Universitetinin yaradılması həmin dövrün ən mühüm nailiyyətlərindən idi.

Azərbaycan xalqının tarixində 28 May xüsusi əhəmiyyətə malik günlərdən biridir. 1918-ci il mayın 28-də yaradılmış Azərbaycan Xalq Cümhuriyyəti xalqımızın azadlıq və müstəqillik arzularının həyata keçməsi idi. Şərqdə və müsəlman aləmində ilk demokratik, hüquqi və dünyəvi dövlətin məhz Azərbaycanda qurulması xalqımızın nə qədər böyük dövlətçilik ənənələrinə malik olduğunu göstərdi.

Bu gün Azərbaycan xalqı 28 May – Müstəqillik Gününü böyük fəxr hissi ilə qeyd edir. Azərbaycan Xalq Cümhuriyyətinin qoyduğu dövlətçilik ənənələri müasir Azərbaycanın inkişafında mühüm rol oynayır. Gənc nəslin vətənpərvər ruhda böyüməsi, dövlətimizin tarixini və milli dəyərlərini dərindən öyrənməsi hər birimizin qarşısında duran vacib vəzifələrdəndir.

Bu gün cənab Prezident Ilham Əliyev tərəfindən uğurla davam etdirilən siyasət nəticəsində Azərbaycan daha da güclənmişdir. Dövlətimizin ərazi bütövlüyünün təmin olunması, işğaldan azad edilmiş torpaqlarımızda üçrəngli bayrağımızın dalğalanması hər bir azərbaycanlı üçün böyük qürur mənbəyidir. Prezident İlham Əliyevin dediyi kimi: “Müstəqilliyimiz əbədidir, dönməzdir, sarsılmazdır.”

Ulu Öndər Heydər Əliyev Azərbaycan Xalq Cümhuriyyətinin yaranmasını yüksək dəyərləndirərək qeyd etmişdir: “Müsəlman Şərqində ilk demokratik cümhuriyyətin məhz Azərbaycan torpağında yaranması xalqımızın milli azadlıq və müstəqillik duyğuları ilə yaşaması ilə bağlıdır.” Bu fikir Azərbaycan xalqının tarix boyu azadlıq ideallarına bağlı olduğunu bir daha göstərir.

Bakıxanov qəsəbəsi, 74 nömrəli tam orta məktəbin

İbtidai sinif müəllimi Xəyalə Ağayeva