Şərqdə və müsəlman aləmində ilk demokratik dövlət quruluşunu yaratmış Azərbaycan Xalq Cümhuriyyəti istiqlaliyyətimizi elan edərək, xalqımızın müstəqillik əzmini nümayiş etdirmişdir. 1918-ci il mayın 28-də Azərbaycan xalqı özünün və Şərqin ilk demokratik, hüquqi, dünyəvi parlament respublikasını yaradıb.

Bu tarixi addım Azərbaycan xalqının azadlıq və dövlətçilik ənənələrinin davamı idi. Cümhuriyyət qısa fəaliyyəti dövründə milli parlamentin təşkili, çoxpartiyalı sistemin tətbiqi, mətbuat və söz azadlığının təmin olunması, qadınlara seçki hüququnun verilməsi kimi demokratik islahatları həyata keçirdi. Beləliklə, Şərqdə ilk dəfə hüquqi dövlət quruculuğunun əsasları qoyuldu.

Müstəqilliyimizin bərpasından sonra Ulu öndər Heydər Əliyevin rəhbərliyi ilə Azərbaycan dövlətçiliyi möhkəmləndi. Ulu öndər Heydər Əliyev ölkədə siyasi sabitliyi bərpa etdi, hüquqi dövlət quruculuğunu gücləndirdi və 1995-ci il Konstitusiyasının qəbulu ilə Azərbaycan Xalq Cümhuriyyətinin ideyalarını müasir dövlətçilikdə yaşatdı.

Bu gün cənab prezident İlham Əliyevin rəhbərliyi ilə Azərbaycan müstəqil, güclü və hüquqi dövlət kimi inkişaf edir. Cənab prezident İlham Əliyevin apardığı siyasət ölkəmizin beynəlxalq nüfuzunu artırır, vətəndaşların hüquq və azadlıqlarının qorunmasını təmin edir. Azərbaycan Xalq Cümhuriyyətinin 1918-ci ildə qoyduğu təməl bu gün də gənclərin hüquqi savadlılığının artırılmasında və qanunçuluğa hörmət ruhunda tərbiyə olunmasında əsas istinad nöqtəsidir.

Beləliklə, Azərbaycan Xalq Cümhuriyyəti tariximizin şanlı səhifəsi olaraq qalır və müasir Azərbaycan dövlətçiliyi üçün tükənməz mənəvi qaynaqdır.

Bakıxanov qəsəbəsi, 75 nömrəli tam orta məktəbin

İbtidai sinif müəllimi Fərzanə Heydərli