Azərbaycan xalqının şanlı tarixində xüsusi yer tutan 28 May günü milli dövlətçilik tariximizin ən mühüm səhifələrindən biridir. 1918-ci ilin məhz bu günündə müsəlman Şərqində ilk parlamentli demokratik respublika olan Azərbaycan Xalq Cümhuriyyətinin yaradılması elan edildi. Bu tarixi hadisə Azərbaycan xalqının azadlıq, müstəqillik və milli dövlətçilik arzularının gerçəkləşməsi idi.

Cəmi 23 ay fəaliyyət göstərməsinə baxmayaraq, Azərbaycan Xalq Cümhuriyyəti mühüm dövlət quruculuğu işləri həyata keçirdi. Dövlət bayrağı təsis olundu, milli ordu yaradıldı, parlament formalaşdırıldı, təhsil və mədəniyyət sahəsində böyük addımlar atıldı. Ən önəmli hadisələrdən biri isə qadınlara seçki hüququnun verilməsi idi ki, bu da həmin dövr üçün böyük demokratik yenilik hesab olunurdu.

Azərbaycan Xalq Cümhuriyyətinin qurucuları xalqın milli maraqlarını hər şeydən üstün tutaraq gələcək nəsillərə müstəqil dövlət ideyasını miras qoydular. Həmin ideya illər sonra yenidən gerçəkləşdi və 1991-ci ildə Azərbaycan öz dövlət müstəqilliyini bərpa etdi.

Bu gün müstəqil Azərbaycan prezident İlham Əliyev rəhbərliyi ilə daha da güclənir, beynəlxalq aləmdə öz mövqeyini möhkəmləndirir. Ölkəmizin qazandığı uğurlar, əldə etdiyi siyasi və iqtisadi nailiyyətlər müstəqilliyimizin nə qədər dəyərli olduğunu bir daha göstərir.

28 May yalnız bir tarix deyil, xalqımızın azadlıq ruhunun, milli birliyinin və dövlətçilik ənənələrinin simvoludur. Bu əlamətdar gün hər bir azərbaycanlı üçün qürur mənbəyidir. Müstəqilliyimizin əbədi və dönməz olması naminə hər bir vətəndaş öz üzərinə düşən məsuliyyəti dərk etməli, dövlətimizin daha da güclənməsi üçün çalışmalıdır

Bakıxanov qəsəbəsi, 107 nömrəli tam orta məktəbin

tarix müəllimi Türkan Mehdiyeva