28 May tarixi keçmişimizdə və salnaməmizdə xüsusi yeri olan hadisədir. Çünki ilk dəfə Azərbaycan xalqı müqəddəratını öz gücü hesabına həll etmək niyyətini ortaya qoydu və böyük bir uğur qazandı. Ona qədər Azərbaycan xalqı həmişə mərkəzi qüvvələrin əsarəti altında yaşayıb və təbii ki, haqq-hüquqları pozulurdu. Azərbaycan ziyalılarını təmsil edənlərin yekdil fikri yox idi ki, Azərbaycan müqəddəratını özü həll etsin. Bəziləri deyirdi ki, mədəni muxtariyyət olsa kifayət edər. Amma klassiklərin öncülləri birmənalı şəkildə dedilər ki, gərək siyasi müstəqilliyimizi tələb edək və müstəqil inkişaf yoluna qədəm qoyaq. Bununla da çox vacib və tarixi əhəmiyyətə malik başlanğıc ərsəyə gəldi.

O zaman dünyada çox mürəkkəb geosiyasi vəziyyət var idi. İmperiya qüvvələri çalışırdılar ki, öz imkanları artırsın və yeni ərazilər zəbt etsinlər. O dönəm Rusiya müharibədə məğlub oldu. Bunun Azərbaycan xalqı üçün imkanlar açması göz önündə idi. Proseslərdə bəlli oldu ki, millətin özünün niyyəti var, onun aparıcı qüvvələri çalışırlar ki, Azərbaycan xalqı üçün gələcəyin yolunu müəyyən etsinlər. Bəli, müstəqilliyimiz mürəkkəb vəziyyətdə duruş gətirə bilmədi. Lakin, vaxt otdükcə biz gördük ki, ötən əsrdə Azərbaycan xalqı artıq ikinci dəfə öz müstəqilliyini bərpa etdi və inkişaf yoluna çıxdı.

1993-cü ildə Ulu öndər Heydər Əliyev xalqın tələbi ilə hakimiyyətə çağırıldı. Bu çox vacib və tarixi dönüş nöqtəsi idi. Bu baxımdan da Azərbaycan xalqı özünə inamını qaytardı. Bizim üçün ən əsas nailiyyət ondan ibarətdir ki, gələcəyə gedən yolu müəyyən etmişik. Yəni, siyasi, mədəni, humanitar prioritetlərin hamısı öz təsdiqini tapıb. Güclü liderimizin olması, onun xələfi olan cənab İlham Əliyevin hakimiyyətə gəlməsi, siyasi diplomatik sahədəki uğurlarımız, inteqrasiyada verdiyimiz böyük paylar dövlətçiliyimizin sütununu möhkəmləndirir. Ona görə bu hadisənin başlanğıc nöqtəsi kimi çox böyük əhəmiyyəti var və qədrini bilməliyik.

Biz bu gün Ermənistanın vəziyyətini də görürük. Təsadüfi deyil ki, cənab Prezidentimiz deyirdi ki, "Ermənilər öz suverenliyini get-gedə itirirlər". Bu baxımdan biz həm yetkin bir xalq kimi özümüzü təsdiqlədik, həm də göstərdik ki, dünya birliyinin ayrılmaz hissəsiyik. 44 günlük Vətən müharibəsində əldə etdiyimiz qələbə də göstərdi ki, biz həm də döyüşkən və milli birliyimizi qoruyub saxlaya bilən xalqıq. Bütün bu proseslərin hamısında tariximizdən boylanan 28 May amilini görürük. Bu bizim üçün çox qürurvericidir.

Dilbər Rəhimova-4 saylı Uşaq Musiqi məktəbinin direktoru