Azərbaycan Respublikasının Prezidenti İlham Əliyev və Almaniya Federativ Respublikasının Federal Kansleri Fridrix Merts arasında keçirilən yüksək səviyyəli görüş iki ölkə arasındakı diplomatik və iqtisadi münasibətlərdə tamamilə yeni bir səhifə açdı. Görüşün yekunu olaraq tərəflər arasında iki ölkənin strateji və iqtisadi gələcəyini müəyyən edən mühüm sənədlər imzalandı. Bu tarixi addımlar Azərbaycanın Avropa ilə inteqrasiya prosesinə, xüsusilə də regionun aparıcı dövləti olan Almaniya ilə hərtərəfli əməkdaşlığına yeni stimul verir.
Görüşün ən əhəmiyyətli nəticələrindən biri “Azərbaycan Respublikası və Almaniya Federativ Respublikası arasında ikitərəfli tərəfdaşlıq üçün strateji gündəliyə dair Birgə Bəyannamə”nin imzalanması oldu. Prezident İlham Əliyev və Federal Kansler Fridrix Merts tərəfindən imzalanan bu sənəd Bakı və Berlin arasında münasibətlərin artıq keyfiyyətcə yeni — strateji müstəviyə keçdiyini sübut edir. İmzalanan Strateji Gündəlik yalnız cari əməkdaşlığı əks etdirmir, həm də gələcək illər üçün Azərbaycan-Almaniya münasibətlərinin yol xəritəsini müəyyən edir.
Birgə Bəyannamə bir neçə əsas istiqaməti əhatə edir. Siyasi dialoq və təhlükəsizlik sahəsində siyasi münasibətlərin intensivləşdirilməsi, regional sabitlik və təhlükəsizlik məsələlərində sıx məsləhətləşmələrin aparılması nəzərdə tutulur. Enerji və yaşıl keçid istiqamətində isə ənənəvi enerji resursları ilə yanaşı, bərpaolunan enerji, "yaşıl hidrogen" istehsalı və ətraf mühitin mühafizəsi sahəsində birgə layihələrin həyata keçirilməsi planlaşdırılır. Eyni zamanda, Şərq-Qərb və Cənub-Qərb nəqliyyat dəhlizləri çərçivəsində, xüsusilə Orta Dəhliz layihəsində logistik imkanların artırılması, təhsil, mədəniyyət və texnoloji mübadilə proqramlarının genişləndirilməsi də sənədin əsas prioritetləri sırasındadır.
Tərəflər arasında imzalanan digər mühüm sənəd Azərbaycan-Almaniya Biznes Şurasının yaradılmasına və fəaliyyətinə dair Birgə Bəyannamə oldu. Bu addım iki ölkənin işgüzar dairələri arasında birbaşa təmasların qurulması və qarşılıqlı sərmayə qoyuluşunun təşviqi baxımından müstəsna əhəmiyyət kəsb edir. Biznes Şurasının əsas məqsədi Almaniya kapitalının və texnologiyalarının Azərbaycana cəlb olunması, sənaye və kənd təsərrüfatında modernləşmənin təmin edilməsidir. Şura kiçik və orta sahibkarlar arasında tərəfdaşlığı gücləndirməklə yeni birgə müəssisələrin yaradılmasına, ixrac potensialının artmasına və ikitərəfli ticarət dövriyyəsinin davamlı yüksəlməsinə xidmət edəcəkdir.
Almaniya Avropa İttifaqının aparıcı iqtisadiyyatı, Azərbaycan isə Cənubi Qafqazın əsas iqtisadi və logistik mərkəzidir. Bu baxımdan, Prezident İlham Əliyev və Federal Kansler Fridrix Merts arasında əldə olunmuş razılaşmalar regional çərçivəni aşaraq beynəlxalq miqyaslı təsirə malikdir. İki ölkə arasında prioritet sahələrdən biri olan enerji təhlükəsizliyi çərçivəsində Azərbaycan Avropanın etibarlı tərəfdaşı kimi çıxış edir. Almaniya texnologiyaları ilə Azərbaycanın enerji resurslarının sintezi Avropanın enerji şaxələndirilməsinə mühüm töhfə verir. Eyni zamanda, Azərbaycanın bərpaolunan enerji potensialı Almaniya şirkətləri üçün böyük investisiya meydanı açır və Almaniyanın zəngin sənaye təcrübəsinin tətbiqi ölkə iqtisadiyyatının qeyri-neft sektorunun inkişafını sürətləndirir.
Yekun olaraq qeyd etmək olar ki, imzalanmış Birgə Bəyannamələr Azərbaycan və Almaniya arasında tərəfdaşlığın keyfiyyətcə yeni mərhələyə qədəm qoyduğunu parlaq şəkildə nümayiş etdirir. Yaradılan Azərbaycan-Almaniya Biznes Şurası və təsdiqlənən Strateji Gündəlik hər iki ölkənin milli maraqlarına xidmət etməklə yanaşı, regional sabitliyə və iqtisadi inkişafa böyük töhfə verəcəkdir.
170 nömrəli tam orta ümumtəhsil məktəbin direktoru Ülviyyə Aslanova