Şuşa Azərbaycan xalqının tarixində, milli-mənəvi yaddaşında və mədəniyyətində xüsusi yer tutur. Qarabağın tacı adlandırılan bu şəhər əsrlər boyu Azərbaycanın ictimai, siyasi və mədəni həyatının mühüm mərkəzlərindən biri olub. Şuşa yalnız özünəməxsus təbiəti və memarlıq abidələri ilə deyil, həm də yetişdirdiyi görkəmli şairlər, bəstəkarlar, xanəndələr və digər sənət adamları ilə tanınıb. Buna görə də Şuşanın taleyi hər zaman xalqımızın taleyi ilə sıx bağlı olub.
Qarabağ Zəfərinə aparan yolun başlanğıcı Ulu öndər Heydər Əliyev tərəfindən qoyulmuşdu. Ulu öndər Heydər Əliyev Qarabağ probleminin Azərbaycanın dövlət siyasətində prioritet məsələ kimi qalmasına, tarixi həqiqətlərin beynəlxalq ictimaiyyətə çatdırılmasına və milli birliyin möhkəmləndirilməsinə xüsusi önəm verirdi. Onun müəyyən etdiyi siyasi xətt sonrakı dövrdə də ardıcıl şəkildə davam etdirildi.
Cənab prezident İlham Əliyev Ulu öndər Heydər Əliyevin müəyyənləşdirdiyi strateji istiqaməti davam etdirərək Azərbaycanın ərazi bütövlüyünün bərpasını dövlət siyasətinin əsas məqsədlərindən biri kimi qarşıya qoydu. 2020-ci il sentyabrın 27-də başlayan Vətən müharibəsi Azərbaycan Ordusunun gücünü, xalqımızın birliyini və dövlətimizin qətiyyətini nümayiş etdirdi. 44 gün davam edən müharibənin ən mühüm hadisələrindən biri Şuşa şəhərinin azad olunması oldu.
2020-ci il noyabrın 8-də Şuşanın azad edilməsi Azərbaycan tarixində əbədi yaşayacaq möhtəşəm Zəfər kimi yadda qaldı. Şuşanın mürəkkəb relyefi və strateji mövqeyi əməliyyatı xüsusi çətinləşdirirdi. Azərbaycan hərbçilərinin böyük peşəkarlıq, cəsarət və fədakarlıq göstərərək şəhəri azad etməsi Vətən müharibəsinin taleyinə həlledici təsir göstərdi. Şuşanın azad olunması ilə müharibədə qələbəyə aparan yol daha da möhkəmləndi.
Şuşa Zəfəri yalnız hərbi uğur deyil, həm də tarixi ədalətin bərpası, milli iradənin və birliyin təntənəsi idi. Cənab prezident İlham Əliyevin 8 noyabr 2020-ci ildə xalqa müraciətində səsləndirdiyi “Şuşa indi azaddır! Biz Şuşaya qayıtmışıq!” sözləri xalqımızın uzun illər gözlədiyi sevincin və qürurun ifadəsinə çevrildi. Bu qələbə şəhidlərimizin qanı, qazilərimizin fədakarlığı və əsgərlərimizin qəhrəmanlığı hesabına qazanıldı.
Azadlıqdan sonra Şuşada genişmiqyaslı bərpa və quruculuq işlərinə başlanıldı. Cənab prezident İlham Əliyevin azad olunmuş şəhərə səfərləri zamanı tarixi abidələrin, məscidlərin, muzeylərin və digər mədəniyyət ocaqlarının bərpası, yeni yaşayış komplekslərinin və infrastrukturun yaradılması istiqamətində görülən işlər diqqət mərkəzində saxlanıldı. Molla Pənah Vaqifin muzey-məqbərə kompleksi, Bülbülün ev-muzeyi, Üzeyir Hacıbəylinin ev-muzeyi və digər tarixi-mədəni məkanlar Şuşanın zəngin irsinin yaşadılmasına xidmət edir.
Şuşanın dirçəldilməsi təkcə şəhərin fiziki bərpası demək deyil. Bu proses həm də onun əvvəlki mədəni həyatının canlandırılması, doğma yurdlarından ayrı düşmüş insanların qayıdışı və gələcək nəsillərə zəngin irsin ötürülməsi deməkdir. Şuşada keçirilən “Xarıbülbül” Musiqi Festivalı, mədəni tədbirlər və beynəlxalq görüşlər şəhərin yenidən Azərbaycanın və regionun mühüm mədəniyyət mərkəzlərindən birinə çevrildiyini göstərir.
8 Noyabr – Şuşa şəhəri günü xalqımızın yaddaşında qəhrəmanlıq, birlik və qürur günü kimi yaşayır. Şuşanın azad edilməsi Ulu öndər Heydər Əliyevin müəyyən etdiyi siyasi yolun, cənab prezident İlham Əliyevin qətiyyətli rəhbərliyinin, Azərbaycan Ordusunun gücünün və xalqımızın sarsılmaz birliyinin tarixi nəticəsidir. Şuşa bu gün azad və yenidən qurulan şəhər kimi gələcəyə doğru addımlayır. Onun hər küçəsi, hər daşı xalqımızın tarixinə, mədəniyyətinə və Zəfərinə şahidlik edir.
213 nömrəli məktəb-liseyin Azərbaycan dili və ədəbiyyat müəllimi Abbasova Məsumə