Azərbaycan Respublikasının Prezidenti İlham Əliyev tərəfindən kənd təsərrüfatı sahəsinin inkişafına həsr olunmuş müşavirənin keçirilməsi ölkədə aqrar sektorun strateji əhəmiyyətinin bir daha nümayişi oldu. Müşavirədə kənd təsərrüfatının mövcud vəziyyəti, qarşıda duran vəzifələr, ərzaq təhlükəsizliyi, subsidiya mexanizmləri, su təminatı, ixrac potensialı və fermerlərin sosial rifahı ilə bağlı mühüm məsələlər geniş müzakirə edilib. Prezident İlham Əliyev çıxışı zamanı bildirib ki, kənd təsərrüfatı Azərbaycanın qeyri-neft sektorunun aparıcı istiqamətlərindən biridir və bu sahənin inkişafı həm iqtisadiyyatın şaxələndirilməsi, həm də regionların sosial-iqtisadi inkişafı baxımından mühüm rol oynayır. Dövlət başçısı qeyd edib ki, son illərdə aqrar sahədə həyata keçirilən islahatlar nəticəsində məhsuldarlıq artmış, müasir texnologiyaların tətbiqi genişlənmiş və fermerlərə göstərilən dövlət dəstəyi daha da gücləndirilmişdir. Müşavirədə kənd təsərrüfatında innovativ yanaşmaların tətbiqinin vacibliyi xüsusi vurğulanıb. Bildirilib ki, müasir suvarma sistemlərinin qurulması, rəqəmsal idarəetmənin genişləndirilməsi və aqrar sahədə elmi yanaşmaların tətbiqi məhsuldarlığın artırılmasına mühüm töhfə verəcək. Eyni zamanda, iqlim dəyişikliklərinin kənd təsərrüfatına təsiri nəzərə alınaraq su ehtiyatlarından səmərəli istifadə məsələsi prioritet istiqamət kimi dəyərləndirilib.

Prezident İlham Əliyev fermerlərin dövlət dəstəyi ilə təmin olunmasının davam etdiriləcəyini qeyd edərək subsidiya proqramlarının daha şəffaf və əlçatan şəkildə həyata keçirilməsinin vacibliyini vurğulayıb. Dövlət başçısı kənd təsərrüfatı məhsullarının ixrac imkanlarının genişləndirilməsi, yerli məhsulların beynəlxalq bazarlarda rəqabət qabiliyyətinin artırılması istiqamətində də aidiyyəti qurumlara müvafiq tapşırıqlar verib.

Müşavirədə həmçinin işğaldan azad edilmiş ərazilərdə aqrar fəaliyyətin bərpası və inkişaf perspektivləri də diqqət mərkəzində olub. Qeyd edilib ki, həmin ərazilərin zəngin torpaq və su ehtiyatları kənd təsərrüfatının inkişafı üçün geniş imkanlar yaradır və bu istiqamətdə artıq mühüm layihələrin icrasına başlanılıb.

Keçirilən müşavirə bir daha göstərdi ki, Azərbaycan dövləti kənd təsərrüfatının inkişafını ölkənin iqtisadi siyasətinin əsas prioritetlərindən biri hesab edir. Aqrar sahənin inkişafı həm ərzaq təhlükəsizliyinin təmin olunmasına, həm də regionlarda məşğulluğun artırılmasına mühüm töhfə verməkdə davam edəcək.

Altun İbrahimov – YAP Sabunçu rayon təşkilatının məsləhətçisi