Azərbaycan tarixində xalqının taleyində silinməz iz qoymuş böyük şəxsiyyətlər çoxdur. Bu şəxsiyyətlər sırasında ümummilli lider Heydər Əliyevin xüsusi yeri vardır. O, Azərbaycanın müstəqilliyinin möhkəmləndirilməsi, dövlətçiliyimizin qorunması və ölkəmizin inkişafı naminə misilsiz xidmətlər göstərmiş dahi dövlət xadimidir. Azərbaycan xalqı üçün böyük iftixar mənbəyi olan Heydər Əliyevin adı Naxçıvan torpağı ilə sıx bağlıdır.
Naxçıvan qədim və zəngin tarixə malik olmaqla yanaşı, Azərbaycan dövlətçilik tarixində mühüm rol oynayan görkəmli şəxsiyyətlər yetirmişdir. Heydər Əliyevin bu müqəddəs torpaqda dünyaya gəlməsi Naxçıvanın tarixində xüsusi əhəmiyyət daşıyan hadisələrdən biridir. Onun uşaqlıq və gənclik illərinin Naxçıvanla bağlı olması gələcəkdə formalaşacaq böyük dövlət xadiminin həyat yolunda mühüm mərhələ təşkil etmişdir.
Heydər Əliyev bütün siyasi fəaliyyəti boyu Azərbaycan xalqının milli maraqlarını hər şeydən üstün tutmuşdur. Onun rəhbərliyi dövründə ölkəmizdə iqtisadiyyatın, elm və təhsilin, mədəniyyətin inkişafı istiqamətində mühüm addımlar atılmışdır. Ulu Öndər milli-mənəvi dəyərlərin qorunmasına, Azərbaycan dilinin və milli özünüdərkin inkişafına xüsusi diqqət yetirmişdir.
Azərbaycanın müstəqilliyinin bərpasından sonra ölkənin qarşılaşdığı mürəkkəb siyasi və iqtisadi problemlərin həllində Heydər Əliyevin xidmətləri əvəzsiz olmuşdur. Onun xalqın tələbi ilə yenidən siyasi hakimiyyətə qayıdışı dövlətçiliyimizin qorumasında mühüm dönüş nöqtəsinə çevrilmişdir. Ulu Öndərin uzaqgörən siyasəti nəticəsində Azərbaycanda siyasi sabitlik möhkəmlənmiş, dövlət institutları inkişaf etdirilmiş və ölkənin beynəlxalq nüfuzu yüksəlmişdir.
Heydər Əliyevin Naxçıvanla bağlı fəaliyyəti də xüsusi diqqətə layiqdir. O, Naxçıvanın ağır və mürəkkəb şəraitində muxtar respublikanın sosial-iqtisadi və siyasi həyatının qorunması istiqamətində mühüm işlər görmüşdür. Naxçıvan Ali Məclisinin Sədri kimi fəaliyyət göstərdiyi dövrdə qəbul olunan mühüm qərarlar milli dövlətçilik baxımından böyük əhəmiyyət daşımışdır. Azərbaycan üçrəngli bayrağının Naxçıvanda dövlət rəmzi kimi qaldırılması da milli dövlətçilik tariximizin əlamətdar hadisələrindən biri olmuşdur.
Ulu Öndərin siyasi irsi bu gün də Azərbaycan xalqı üçün böyük əhəmiyyət daşıyır. Onun dövlətçilik fəlsəfəsi, azərbaycançılıq ideyası və milli birlik çağırışları gələcək nəsillər üçün mühüm örnəkdir. Heydər Əliyevin ideyalarının davam etdirilməsi Azərbaycanın inkişafının və dövlət müstəqilliyinin daha da möhkəmləndirilməsinə xidmət edir.
Nəticə etibarilə, Naxçıvan Azərbaycan xalqına yalnız qədim tarixi və zəngin mədəniyyəti ilə deyil, həm də dünya miqyasında tanınan böyük dövlət xadimi Heydər Əliyev kimi dahi şəxsiyyət bəxş edib. Ulu Öndərin həyat və fəaliyyəti Azərbaycan tarixinin şərəfli səhifələrindən biridir. Onun adı xalqımızın yaddaşında əbədi yaşayacaq, dövlətçilik ideyaları isə gələcək nəsillərə yol göstərən mənəvi irs olaraq qalacaq.
Sabunçu rayonu 71 nömrəli tam orta məktəbin tarix müəllimi: Imanova Şəhanə