2026-cı il 4 may tarixində Azərbaycan Respublikasının Prezidenti İlham Əliyev “Avropa Siyasi Birliyi”nin 8-ci Zirvə toplantısında videobağlantı formatında çıxış edərək regionda sülh prosesinin mövcud vəziyyəti, əldə olunan nailiyyətlər və qarşıda duran çağırışlar barədə geniş məlumat verdi. Prezidentin çıxışı həm regional əməkdaşlıq, həm də beynəlxalq münasibətlər kontekstində mühüm mesajlarla yadda qaldı.

Çıxışın diqqət çəkən məqamlarından biri Ermənistanın 2028-ci ildə Zirvə görüşünün Azərbaycanda keçirilməsini dəstəkləməsi oldu. Dövlət başçısı qeyd etdi ki, bu qərar regionda sülhün real və mümkün olduğunu göstərən mühüm siyasi siqnaldır. Prezident vurğuladı ki, tərəflər artıq doqquz aydır sülh şəraitində yaşayır və bu yeni mərhələyə uyğunlaşma prosesi davam edir. O, 2028-ci ilin may ayında keçiriləcək Zirvə görüşünə bütün üzv ölkələri dəvət edərək Azərbaycanın dialoq və əməkdaşlıq platforması kimi rolunu bir daha təsdiqlədi.

Prezident İlham Əliyev çıxışında Azərbaycan ilə Ermənistan arasında əldə olunan sülhün praktik nəticələrini də diqqətə çatdırdı. Bildirildi ki, Azərbaycan 1990-cı illərin əvvəllərindən tətbiq etdiyi tranzit məhdudiyyətlərini birtərəfli qaydada aradan qaldıraraq Ermənistana humanitar və iqtisadi dəstək göstərib. Bu çərçivədə Azərbaycan ərazisi vasitəsilə Ermənistana 28 min ton yük çatdırılıb. Bundan əlavə, Azərbaycan ilk dəfə olaraq Ermənistana neft məhsulları – benzin və dizel ixrac etməyə başlayıb və artıq 12 min ton məhsul tədarük olunub. Bu addımlar regionda iqtisadi əməkdaşlığın və qarşılıqlı etimadın formalaşmasına xidmət edir.

Çıxışda beynəlxalq təşkilatların mövqeyi də xüsusi yer aldı. Prezident İlham Əliyev Avropa Parlamenti və Avropa Şurası Parlament Assambleyasının Ermənistan-Azərbaycan sülh prosesinə münasibətdə konstruktiv mövqe sərgiləmədiyini və ikili standartlara yol verdiyini bildirdi. O qeyd etdi ki, Azərbaycan 2001-ci ildən Avropa Şurasının üzvü olsa da, yalnız 2024-cü ildə nümayəndə heyətinə qarşı məhdudiyyətlər tətbiq olunub. Bu addımların 2023-cü ildə Azərbaycanın öz ərazi bütövlüyünü təmin etməsindən sonra baş verməsi isə siyasi yanaşmaların qeyri-obyektivliyini göstərir.

Eyni zamanda, Prezident Avropa Parlamentinin fəaliyyətini tənqid edərək bildirdi ki, bu qurum əsas problemlərlə – ksenofobiya, islamofobiya, antisemitizm, miqrasiya və sosial məsələlərlə məşğul olmaq əvəzinə Azərbaycana qarşı qərəzli qətnamələr qəbul edir. Son beş il ərzində qəbul olunan 14 qətnamə bunun bariz nümunəsi kimi təqdim olundu. Buna cavab olaraq Azərbaycan parlamentinin Avropa Parlamenti ilə əməkdaşlığı dayandırmaq barədə qərar qəbul etdiyi diqqətə çatdırıldı.

Prezident İlham Əliyev çıxışında regional kommunikasiya layihələrinə də toxundu. Xüsusilə “Trampın Beynəlxalq Sülh və Rifah Marşrutu”nun Azərbaycanı Naxçıvanla birləşdirəcəyini və Orta Dəhlizin mühüm hissəsinə çevriləcəyini qeyd etdi. Bu layihə regionda iqtisadi inteqrasiyanın güclənməsinə və nəqliyyat imkanlarının genişlənməsinə töhfə verəcək.

Sonda dövlət başçısı vurğuladı ki, sülh prosesinə mane olmaq istəyən qüvvələrin səylərinə baxmayaraq, Azərbaycan sülh gündəliyinə sadiqdir. O, Ermənistanın Baş naziri Nikol Paşinyanı Zirvə görüşünün Ermənistanda keçirilməsi münasibətilə təbrik edərək, qarşılıqlı dialoqun davam etdirilməsinin vacibliyini qeyd etdi.

Beləliklə, Prezident İlham Əliyevin çıxışı Azərbaycanın regionda sabitlik, əməkdaşlıq və davamlı sülh naminə apardığı siyasətin ardıcıl və prinsipial xarakter daşıdığını bir daha nümayiş etdirdi.

Bakıxanov qəsəbəsi, 74 nömrəli tam orta ümumtəhsil məktəbinin

ibtidai sinif müəllimi Vüsalə Bayramova