2026-cı il mayın 4-də “Avropa Siyasi Birliyi”nin 8-ci Zirvə toplantısına videobağlantı formatında qatılan Azərbaycan Respublikasının Prezidenti Cənab İlham Əliyev, regionun gələcək simasını müəyyən edən strateji mesajlar verib. Dövlət başçısının çıxışı həm Ermənistanla münasibətlərdə əldə olunmuş real sülhün göstəricisi, həm də bəzi Avropa təsisatlarının qərəzli mövqeyinə qarşı kəskin diplomatik cavab kimi xarakterizə oluna bilər.

Prezident cənab İlham Əliyev çıxışında ən mühüm məqam kimi Azərbaycan və Ermənistan arasında artıq doqquz aydır davam edən sülh şəraitini vurğulayıb. Bu sülh sadəcə kağız üzərində deyil, iqtisadi və logistik müstəvidə də özünü büruzə verir:

Azərbaycanın birtərəfli qaydada məhdudiyyətləri aradan qaldırması nəticəsində Ermənistana 28 min ton yük, o cümlədən ilk dəfə olaraq 12 min ton Azərbaycan neft məhsulları (benzin və dizel) çatdırılıb.

Azərbaycan və Ermənistanın bir-birinin ev sahibliyi namizədliyini dəstəkləməsi sülh prosesinin ən böyük diplomatik uğuru kimi dəyərləndirilməlidir. Prezident 2026-cı ildə Zirvə görüşünün Ermənistanda keçirilməsini dəstəklədiyini, qarşılıqlı addım olaraq isə Ermənistanın 2028-ci ildə bu mötəbər tədbirin Azərbaycanda keçirilməsinə razılıq verdiyini açıqlayıb. Bu, iki ölkə arasındakı etimadın ən aydın göstəricisidir.

Prezidentin çıxışında ən sərt tənqid hədəfi Avropa Parlamenti və AŞPA olub. Dövlət başçısı bu qurumların Azərbaycanın suverenliyini bərpa etməsini həzm edə bilməməsini və sanksiyalar yolu ilə sülh prosesini sabotaj etməsini kəskin pisləyib:

Avropa Parlamenti: Son 5 ildə Azərbaycan əleyhinə 14 qərəzli qətnamə qəbul edən bu qurum, daxili problemlərini (ksenofobiya, islamofobiya) həll etmək əvəzinə manipulyasiya ilə məşğul olmaqda ittiham edilib.

Azərbaycanın bu qərəzli yanaşmalara cavab olaraq Avropa Parlamenti ilə bütün sahələrdə əməkdaşlığı dayandırması və Avronest PA-dan çıxmaq qərarı rəsmi Bakının milli maraqlarını hər şeydən üstün tutduğunun nümayişidir.

Cənab İlham Əliyevin çıxışı bir daha sübut etdi ki, Azərbaycan sülh gündəliyinə sadiqdir və regionun rifahı üçün konstruktiv addımlar atmaqda davam edir. Lakin bu sülh kənar təzyiqlər və ikili standartlar kölgəsində deyil, qarşılıqlı hörmət və beynəlxalq hüququn aliliyi əsasında qurulur. Prezidentin vurğuladığı kimi, bütün maneələrə baxmayaraq, Azərbaycan öz ərazi bütövlüyünü bərpa etmiş qalib dövlət kimi yeni sülh arxitekturasının əsas müəllifidir.

Zabrat qəsəbəsi, 81 nömrəli tam orta ümumtəhsil məktəbinin

tarix müəllimi Almaz Əzimova