Müasir dövrdə Azərbaycanın beynəlxalq münasibətlər sistemində artan rolu, xüsusilə sülh və əməkdaşlıq təşəbbüslərində fəal iştirakı diqqət mərkəzindədir. Bu baxımdan cənab prezident İlham Əliyevin 2026-cı il 4 may tarixində “Avropa Siyasi Birliyi”nin 8-ci Zirvə toplantısında videobağlantı formatında çıxışı mühüm siyasi və diplomatik əhəmiyyət kəsb edir. Sözügedən çıxış regionda sülhün möhkəmləndirilməsi, əməkdaşlığın genişləndirilməsi və beynəlxalq platformalarda Azərbaycanın mövqeyinin təqdim olunması baxımından xüsusi önəm daşıyır.

Cənab prezident İlham Əliyev çıxışında vurğulamışdır ki, Ermənistan “Avropa Siyasi Birliyi”nin Zirvə görüşünün 2028-ci ildə Azərbaycanda keçirilməsini dəstəkləmişdir. Bu fakt Azərbaycan ilə Ermənistan arasında münasibətlərin normallaşması istiqamətində atılan mühüm addımlardan biri kimi qiymətləndirilir.

Sülhün əldə olunması yalnız siyasi bəyanatlarla deyil, real nəticələrlə də müşayiət olunur. Azərbaycanın təşəbbüsü ilə Ermənistan ərazisinə 28 min ton yük çatdırılmış, həmçinin 12 min ton neft məhsulu ixrac edilmişdir.

Sonda cənab prezident İlham Əliyev vurğulamışdır ki, Azərbaycan sülh gündəliyinə sadiq qalır. Bu siyasət Ulu öndər Heydər Əliyevin müəyyən etdiyi strateji kursun davamıdır.

Bakıxanov qəsəbəsi, 96 nömrəli tam orta ümumtəhsil

məktəbinin ibtidai sinif müəllimi Xanım Ələkbərova-Əlixanlı