Azərbaycan Respublikasının Prezidenti İlham Əliyev Avropa məkanında baş verən mühüm siyasi proseslərdə aktiv iştirak edən liderlərdən biridir. Onun Avropa Siyasi Birliyi Zirvə Toplantısında etdiyi çıxış ölkəmizin beynəlxalq münasibətlər sistemində tutduğu mövqeni, regionda sülh və əməkdaşlıq təşəbbüslərini bir daha nümayiş etdirmişdir.

Prezident İlham Əliyev tədbirdəki çıxışında ilk növbədə Azərbaycanın müstəqil və balanslaşdırılmış xarici siyasət kursunu vurğulamış, ölkənin həm Avropa, həm də digər beynəlxalq tərəfdaşlarla qarşılıqlı hörmət və bərabərhüquqlu əməkdaşlıq prinsipləri əsasında münasibətlər qurduğunu qeyd etmişdir. Bu yanaşma Azərbaycanın geosiyasi əhəmiyyətini artırmaqla yanaşı, onu etibarlı tərəfdaş kimi tanıdır. Tədbirdə diqqət çəkən mühüm istiqamətlərindən biri regionda davamlı sülhün təmin olunması məsələsi olmuşdur. Dövlət başçısı Cənubi Qafqazda yeni reallıqların formalaşdığını qeyd edərək, münaqişə sonrası dövrdə sülh gündəliyinin irəli aparılmasının vacibliyini xüsusi vurğulamışdır. Bu kontekstdə Azərbaycan tərəfindən irəli sürülən sülh təşəbbüslərinin regionda sabitliyin möhkəmləndirilməsinə xidmət etdiyi diqqətə çatdırılmışdır.

Prezident İlham Əliyev həmçinin enerji təhlükəsizliyi məsələsinə toxunaraq Azərbaycanın Avropanın enerji təminatında oynadığı rolu ön plana çıxarmışdır. Xüsusilə, ölkəmizin təbii qaz ixracı sahəsində həyata keçirdiyi layihələr Avropa ölkələrinin enerji təhlükəsizliyinin təmin edilməsində mühüm əhəmiyyət kəsb edir. Bu baxımdan Azərbaycan etibarlı enerji tərəfdaşı kimi çıxış edir və gələcəkdə bu əməkdaşlığın daha da genişlənməsi üçün böyük potensial mövcuddur.

Bununla yanaşı, nəqliyyat və logistika sahəsində əməkdaşlıq məsələləri də xüsusi yer tutmuşdur. Azərbaycan Şərq-Qərb və Şimal-Cənub nəqliyyat dəhlizlərinin əsas iştirakçılarından biri kimi beynəlxalq ticarətin inkişafına töhfə verir. Bu layihələr region ölkələri ilə yanaşı, Avropa dövlətləri üçün də mühüm iqtisadi imkanlar yaradır. Prezident İlham Əliyevin çıxışında beynəlxalq hüququn prinsiplərinə hörmətin vacibliyi də qeyd olunmuşdur. Dövlət başçısı vurğulamışdır ki, ölkələr arasında münasibətlər yalnız suverenlik və ərazi bütövlüyü prinsiplərinə əsaslanmalıdır. Bu mövqe Azərbaycanın prinsipial xarici siyasət kursunun əsasını təşkil edir.

Azərbaycan Prezidentinin Avropa Siyasi Birliyinin Zirvə Toplantısındakı çıxışı Azərbaycanın beynəlxalq arenadakı rolunu və təşəbbüskarlığını bir daha təsdiqləmişdir. Bu çıxış həm də ölkəmizin regionda sülhün təmin olunması, enerji təhlükəsizliyinin gücləndirilməsi və iqtisadi əməkdaşlığın genişləndirilməsi istiqamətində atdığı addımların beynəlxalq ictimaiyyət tərəfindən diqqətlə izlənildiyini göstərir.

Vüqar Muradov-YAP Sabunçu rayon təşkilatının fəal üzvü, Vətən müharibəsi qazisi