Cənab Prezident İlham Əliyev və Giorgia Meloni arasında keçirilən görüş və verilən bəyanatlar Azərbaycan–İtaliya münasibətlərinin strateji tərəfdaşlıq səviyyəsində inkişaf etdiyini bir daha təsdiqləyir. Bu münasibətlərin təməli isə Ulu Öndər Heydər Əliyev tərəfindən qoyulmuşdur. Onun uzaqgörən xarici siyasət strategiyası nəticəsində Azərbaycan beynəlxalq arenada etibarlı tərəfdaş kimi tanınmış və Avropa ölkələri, o cümlədən İtaliya ilə əlaqələrin inkişafı üçün möhkəm zəmin yaradılmışdır.

2014 və 2020-ci illərdə imzalanmış sənədlər bu strateji kursun davamı olaraq əməkdaşlığın hüquqi bazasını daha da gücləndirmişdir. İqtisadi sahədə əlaqələr xüsusilə dinamik inkişaf edir. İtaliya Azərbaycanın əsas ticarət tərəfdaşlarından biri olmaqla yanaşı, ölkədə fəaliyyət göstərən İtaliya şirkətləri müxtəlif sahələrdə – sənaye, tikinti, logistika və xidmət sektorlarında mühüm rol oynayır.

Enerji sahəsində əməkdaşlıq isə xüsusi əhəmiyyət kəsb edir. Azərbaycan neft və qazının Avropa bazarlarına çıxarılmasında İtaliya əsas istiqamətlərdən biridir. Bu əməkdaşlıq həm Azərbaycanın iqtisadi inkişafına, həm də Avropanın enerji təhlükəsizliyinə mühüm töhfə verir. Bu strateji enerji siyasətinin əsasları da məhz Heydər Əliyevin müəyyən etdiyi neft strategiyasına dayanır.

Siyasi münasibətlər yüksək səviyyədədir və qarşılıqlı etimada əsaslanır. Tərəflər beynəlxalq təşkilatlarda da bir-birini dəstəkləyir. Eyni zamanda, Bakıda İtaliya–Azərbaycan Universitetinin yaradılması təhsil və mədəni əlaqələrin inkişafına xidmət edir, gənc mütəxəssislərin hazırlanmasına şərait yaradır.

Bundan əlavə, son dövrlərdə hərbi-texniki əməkdaşlıq sahəsində də yeni perspektivlər formalaşır ki, bu da iki ölkə arasında münasibətlərin daha da genişlənəcəyini göstərir.

Nəticə etibarilə, Azərbaycan və İtaliya arasında münasibətlər Ulu Öndər Heydər Əliyevin müəyyən etdiyi strateji kurs əsasında formalaşmış, bu gün isə İlham Əliyev tərəfindən uğurla davam etdirilərək daha da inkişaf etdirilmişdir. Bu tərəfdaşlıq çoxşaxəli olmaqla yanaşı, gələcəkdə daha böyük nailiyyətlər üçün geniş potensiala malikdir.

Pirşağı qəsəbəsi, 305№-li tam orta məktəbin biologiya müəllimi Eyyubova Afaq