Azərbaycan qədim tarixə, zəngin mədəniyyətə və mühüm coğrafi mövqeyə malik olan ölkədir. Ölkəmiz Avropa ilə Asiya arasında yerləşdiyi üçün tarix boyu Şərqlə Qərbin qovuşduğu məkan kimi tanınıb. Bu əlverişli mövqe Azərbaycanın həm iqtisadi, həm siyasi, həm də mədəni baxımdan inkişafına böyük təsir göstərib.

Azərbaycan qədim İpək Yolunun üzərində yerləşdiyinə görə müxtəlif xalqların, mədəniyyətlərin və sivilizasiyaların görüş nöqtəsi olub. Tarix boyunca burada fərqli dinlərə və millətlərə mənsub insanlar sülh və qarşılıqlı hörmət şəraitində yaşayıblar. Bu isə ölkəmizdə tolerantlıq və multikultural dəyərlərin formalaşmasına səbəb olub.

Azərbaycanın zəngin mədəniyyəti Şərq və Qərb ənənələrinin vəhdətini özündə əks etdirir. Milli musiqimiz, memarlığımız, ədəbiyyatımız və adət-ənənələrimiz bunu aydın şəkildə göstərir. Xalqımız öz milli-mənəvi dəyərlərini qoruyaraq müasir inkişaf yolunda inamla irəliləyir.

Ulu Öndər Heydər Əliyev Azərbaycanın inkişafı və dünya dövlətləri arasında layiqli yer tutması üçün böyük xidmətlər göstərmişdir. Onun uzaqgörən siyasəti nəticəsində ölkəmizdə sabitlik yaranmış, iqtisadi inkişafın əsası qoyulmuş və Azərbaycan beynəlxalq aləmdə tanınmağa başlamışdır. Heydər Əliyev hər zaman Azərbaycanın Şərqlə Qərb arasında körpü rolunu xüsusi vurğulamışdır.

Bu gün də Cənab İlham Əliyev Ulu Öndərin siyasi kursunu uğurla davam etdirir. Prezident İlham Əliyevin rəhbərliyi ilə Azərbaycan dünyada nüfuzlu dövlətə çevrilmiş, beynəlxalq layihələrdə fəal iştirak etmişdir. Ölkəmiz həm Avropa, həm də Asiya dövlətləri ilə sıx əməkdaşlıq edir və regionda mühüm strateji mövqeyə sahibdir.

Hazırda Azərbaycan yalnız coğrafi baxımdan deyil, həm də mədəni və siyasi baxımdan Şərqlə Qərbi birləşdirən körpü rolunu oynayır. Bakı şəhərində keçirilən beynəlxalq tədbirlər, forumlar və mədəni layihələr ölkəmizin dünyada artan nüfuzunun göstəricisidir.

Nəticə etibarilə, Azərbaycan qədimdən bu günə qədər Şərqlə Qərbin qovuşduğu məkan olmuşdur. Ölkəmizin strateji mövqeyi, zəngin mədəniyyəti və uğurlu siyasəti onun dünya dövlətləri arasında xüsusi yer tutmasına imkan yaradır. Xalqımız öz milli dəyərlərinə sadiq qalaraq Azərbaycanın daha da inkişaf etməsi üçün birlik və həmrəylik nümayiş etdirir.

Zabrat qəsəbəsi, 71 nömrəli tam orta məktəbin

tarix müəllimi Şəhanə İmanova