Hər bir xalqın milli varlığını yaşadan, onun keçmişini bu günə, bu gününü isə gələcəyə bağlayan ən böyük sərvətlərindən biri ana dilidir. Dil xalqın tarixini, mədəniyyətini, düşüncə tərzini, milli-mənəvi dəyərlərini özündə yaşadan müqəddəs irsdir. Azərbaycan xalqı da əsrlər boyu ana dilini qoruyaraq onu zənginləşdirmiş, nəsildən-nəslə ötürmüş və milli kimliyinin ayrılmaz hissəsinə çevirmişdir. Məhz bu səbəbdən hər il 1 Avqust tarixinin Azərbaycan əlifbası və Azərbaycan dili günü kimi qeyd olunması təkcə təqvimdə xüsusi bir gün deyil, həm də milli şüurun, dövlətçilik ənənələrinin və mənəvi dəyərlərimizin təntənəsidir. Azərbaycan dili əsrlərin sınağından çıxmış, zəngin söz ehtiyatına, yüksək ifadə imkanlarına və dərin bədii-estetik xüsusiyyətlərə malik dillərdən biridir. Bu dil Nizaminin hikmətini, Füzulinin məhəbbətini, Nəsiminin fəlsəfəsini, Cəlil Məmmədquluzadənin satirasını, Üzeyir Hacıbəylinin milli ruhunu yaşadaraq bu günümüzə qədər gəlib çatmışdır. Tarixin müxtəlif dövrlərində Azərbaycan dili müəyyən çətinliklərlə üzləşsə də, xalqımız öz ana dilinə sadiqliyini heç vaxt itirməmişdir. Müstəqilliyini bərpa etdikdən sonra Azərbaycan Respublikasında ana dilinin inkişafı dövlət siyasətinin prioritet istiqamətlərindən birinə çevrildi. Ümummilli Lider Heydər Əliyev Azərbaycan dilinin qorunması, inkişaf etdirilməsi və dövlət dili kimi möhkəmləndirilməsi istiqamətində mühüm addımlar atdı. Onun təşəbbüsü ilə Azərbaycan dili Konstitusiyada dövlət dili kimi təsbit olundu və bu sahədə mühüm hüquqi baza formalaşdırıldı. Ana dilinə göstərilən diqqət milli dövlətçiliyin əsas sütunlarından biri kimi qiymətləndirildi. 2001-ci il 9 avqust tarixində imzalanmış fərmana əsasən isə latın qrafikalı Azərbaycan əlifbasına tam keçid təmin edildi və həmin il avqustun 1-i Azərbaycan əlifbası və Azərbaycan dili günü elan olundu. Bu qərar ölkəmizin milli-mədəni inkişafında mühüm mərhələ olmaqla yanaşı, Azərbaycan dilinin dünya informasiya məkanında daha geniş təmsil olunmasına da mühüm töhfə verdi. Latın qrafikalı əlifbaya keçid müasir dövrün tələblərinə uyğun inkişafın göstəricisi olmaqla yanaşı, milli kimliyimizin daha da möhkəmlənməsinə xidmət etdi. Bu gün Azərbaycan Respublikasının Prezidenti cənab İlham Əliyevin rəhbərliyi ilə ana dilimizin qorunması və inkişaf etdirilməsi istiqamətində ardıcıl siyasət davam etdirilir. Dövlət dilinin tətbiqinin genişləndirilməsi, Azərbaycan dilinin saflığının qorunması, informasiya məkanında düzgün istifadəsinin təmin edilməsi və gənc nəslin ana dilinə bağlı ruhda yetişdirilməsi istiqamətində həyata keçirilən tədbirlər bu siyasətin bariz nümunəsidir. Müasir texnologiyalar dövründə Azərbaycan dilinin rəqəmsal mühitdə inkişaf etdirilməsi, elektron resursların zənginləşdirilməsi və dilimizin beynəlxalq platformalarda daha geniş istifadə olunması da xüsusi diqqət mərkəzində saxlanılır. Qloballaşan dünyada müxtəlif dillərin təsiri altında milli dillərin qorunması hər bir dövlət üçün mühüm vəzifələrdən biridir. Xarici sözlərin həddindən artıq işlədilməsi, sosial şəbəkələrdə dil normalarına laqeyd yanaşılması və yazı mədəniyyətinin zəifləməsi kimi hallar ana dilimizin saflığının qorunmasını daha da aktuallaşdırır. Bu baxımdan hər bir vətəndaşın, xüsusilə müəllimlərin, alimlərin, jurnalistlərin və gənclərin üzərinə böyük məsuliyyət düşür. Ana dilini düzgün bilmək, onu sevərək qorumaq və gələcək nəsillərə olduğu kimi çatdırmaq hər bir azərbaycanlının mənəvi borcudur. Azərbaycan dili təkcə ünsiyyət vasitəsi deyil, həm də milli yaddaşımızın canlı salnaməsidir. Bu dil xalqımızın sevincini, kədərini, qəhrəmanlıq tarixini, adət-ənənələrini və mənəvi zənginliyini özündə yaşadır. Dünyanın müxtəlif ölkələrində yaşayan milyonlarla soydaşımız da məhz ana dili vasitəsilə Vətənə mənəvi bağlılığını qoruyur, milli dəyərlərini gələcək nəsillərə ötürür. 1 Avqust – Azərbaycan əlifbası və Azərbaycan dili günü hər birimizi ana dilimizə daha böyük sevgi və ehtiramla yanaşmağa səsləyir. Bu əlamətdar gün bizə xatırladır ki, dilini qoruyan xalq öz tarixini, mədəniyyətini və dövlətçiliyini də qoruyur. Ana dilimiz bizim milli sərvətimiz, milli kimliyimiz və müstəqilliyimizin ən möhkəm dayaqlarından biridir. Azərbaycan dili dünənimizi bu günə bağlayan, bu günü isə gələcəyə daşıyan müqəddəs mənəvi körpüdür. Bu körpünün möhkəm qalması üçün hər birimiz ana dilimizin saflığını qorumalı, onu düzgün danışmalı, düzgün yazmalı və zənginliyini gələcək nəsillərə olduğu kimi ötürməliyik. Çünki dilinə sahib çıxan xalq heç zaman tarix səhnəsindən silinmir. Azərbaycan dili də bu gün dövlətimizin gücü, xalqımızın birliyi və milli kimliyimizin ən parlaq rəmzlərindən biri kimi yaşayır, inkişaf edir və gələcəyə inamla addımlayır.Azərbaycan dilinin zənginliyi onun hər bir sözündə, hər bir ifadəsində və hər bir deyimində öz əksini tapır. Ana dilimizi qorumaq yalnız dövlətin deyil, bütün cəmiyyətin ortaq məsuliyyətidir. Ailədə uşaqlara ilk öyrədilən sözlərdən başlayaraq məktəbdə verilən təhsilə qədər hər mərhələdə Azərbaycan dilinə sevgi aşılanmalıdır. Gənc nəslin ana dilini mükəmməl mənimsəməsi ölkənin gələcək inkişafı üçün mühüm əhəmiyyət daşıyır. Dilini sevən insan öz millətinin tarixinə və mədəniyyətinə də böyük hörmətlə yanaşır. Azərbaycan dilinin zəngin ədəbi irsi dünya mədəniyyətinin qiymətli nümunələri sırasında xüsusi yer tutur. Müasir dövrdə informasiya texnologiyalarının inkişafı ana dilimizin imkanlarını daha da genişləndirmək üçün yeni fürsətlər yaradır. Sosial mediada və gündəlik həyatda dil normalarına riayət etmək milli mədəniyyətə göstərilən hörmətin ifadəsidir. Azərbaycan əlifbası xalqımızın elmi, ədəbi və mədəni irsinin gələcək nəsillərə ötürülməsində mühüm vasitədir. Hər bir vətəndaş ana dilinin saflığını qorumaqla milli həmrəyliyin möhkəmlənməsinə də töhfə verir. Dövlət dilimizin nüfuzu yüksəldikcə Azərbaycanın beynəlxalq aləmdə tanınması da daha da güclənir. Ana dilimiz milli kimliyimizin ən etibarlı dayağı və mənəvi sərvətimizin ayrılmaz hissəsidir. Bu müqəddəs irsi qorumaq gələcək nəsillərə olan ən qiymətli töhfələrimizdən biri olacaqdır. Qoy Azərbaycan dili daim inkişaf etsin, zənginləşsin və dünyanın hər yerində qürurla səslənsin. Çünki ana dilimizi yaşatmaq, əslində, Azərbaycanın əbədi varlığını və milli ruhunu yaşatmaq deməkdir.
Pirşağı qəsəbəsi, 112 nömrəli tam orta məktəbin ibtidai sinif müəllimi Gülüstan Allahverdiyeva.