27 Sentyabr Azərbaycan xalqının yaddaşında yalnız təqvim günü kimi deyil, həm də Vətən sevgisinin, milli iradənin, qəhrəmanlığın və əbədi ehtiramın rəmzi kimi yaşayır. Bu tarix 2020-ci ildə başlayan Vətən müharibəsinin ilk günü, eyni zamanda Azərbaycanın ərazi bütövlüyü uğrunda canından keçən qəhrəman övladlarının xatirəsinə ehtiram günüdür. Ölkə Prezidenti cənab İlham Əliyevin 2020-ci il 2 dekabr tarixli Sərəncamı ilə hər il sentyabrın 27-sinin Anım Günü kimi qeyd olunması şəhidlərimizin xalqımızın yaddaşında və dövlətimizin mənəvi dəyərlər sistemində tutduğu yüksək yerin ifadəsidir. 
        
Anım Günü ilk növbədə böyük kədərin, lakin bununla yanaşı, böyük qürurun günüdür. Çünki Azərbaycan xalqı bu gün öz qəhrəman övladlarını yad etməklə yanaşı, onların hansı müqəddəs amal uğrunda canlarından keçdiklərini də bir daha xatırlayır. Şəhidlərimiz Vətənin azadlığı, torpaqlarımızın bütövlüyü, xalqımızın şərəf və ləyaqəti naminə ən ali zirvəyə ucaldılar. Onların həyat yolu və qəhrəmanlığı sübut etdi ki, Vətən anlayışı Azərbaycan xalqı üçün sadəcə söz deyil, uğrunda hər cür fədakarlığa hazır olduğu müqəddəs dəyərdir.
        
2020-ci il sentyabrın 27-də başlayan Vətən müharibəsi xalqımızın tarixində dönüş nöqtəsi oldu. Azərbaycan Ordusunun qəhrəmanlığı, xalqın möhtəşəm birliyi və dövlət rəhbərliyinin qətiyyətli siyasəti nəticəsində 44 gün ərzində tarixi ədalət bərpa edildi. Bu möhtəşəm Zəfərin arxasında isə hər bir əsgərin, hər bir zabitin, hər bir şəhidin misilsiz fədakarlığı dayanırdı. Bu gün azad Qarabağda və Şərqi Zəngəzurda dalğalanan üçrəngli bayrağımız şəhidlərimizin müqəddəs ruhunun ən böyük təsəllisi, xalqımızın isə ən böyük qürur mənbəyidir.
        
Şəhidlik Azərbaycan xalqının mənəvi dünyasında ən yüksək məqamdır. Şəhidlər torpağa tapşırılsalar da, xalqın yaddaşından heç vaxt silinmirlər. Onların adları ailələrinin, doğmalarının deyil, bütün xalqın adına çevrilir. Analar şəhid övladları ilə fəxr edir, məktəblərdə onların qəhrəmanlıq yolundan danışılır, küçələrə, məktəblərə və digər məkanlara onların adları verilir. Bu, şəhidlərimizin xatirəsinin əbədiləşdirilməsi ilə yanaşı, həm də gələcək nəsillərin milli ruhda formalaşdırılması baxımından mühüm əhəmiyyət daşıyır.
        
27 Sentyabr bizə bir həqiqəti də xatırladır: dövlətin və xalqın gücü ilk növbədə onun milli birliyindən, Vətənə sədaqətindən və ümumi məqsəd uğrunda birləşmək bacarığından qaynaqlanır. Vətən müharibəsi günlərində Azərbaycan xalqı məhz bu keyfiyyətləri bütün dünyaya nümayiş etdirdi. Fərqli yaşda, peşədə və dünyagörüşündə olan insanlar vahid amal ətrafında birləşərək Ordusuna, dövlətinə və Ali Baş Komandanına sonsuz inam göstərdilər. Bu birlik qələbənin ən mühüm mənəvi dayaqlarından biri oldu.
        
Müasir Azərbaycanın əldə etdiyi tarixi nailiyyətlər Prezident İlham Əliyevin həyata keçirdiyi məqsədyönlü və uzaqgörən siyasətlə sıx bağlıdır. Ulu Öndər Heydər Əliyevin müəyyənləşdirdiyi siyasi kursun müasir dövrün çağırışlarına uyğun şəkildə uğurla davam etdirilməsi Azərbaycanın həm siyasi, həm iqtisadi, həm də hərbi baxımdan qüdrətlənməsini təmin edib. Məhz güclü dövlət, möhkəm iqtisadiyyat və müasir ordu konsepsiyası ölkəmizin tarixi hədəflərinə çatmasında mühüm rol oynadı. Prezident İlham Əliyevin qətiyyəti və milli maraqlara əsaslanan siyasəti Azərbaycanın inkişafını yeni mərhələyə çıxardı, xalqımızın çoxillik arzusunun gerçəkləşməsinə şərait yaratdı.
        
Bu gün şəhidlərimizin ruhu qarşısında ən böyük borcumuz onların bizə əmanət etdiyi Vətəni daha da gücləndirmək, müstəqilliyimizi qorumaq və Azərbaycanın inkişafına töhfə verməkdir. Qarabağda və Şərqi Zəngəzurda aparılan genişmiqyaslı quruculuq işləri də şəhidlərimizin canları bahasına azad edilmiş torpaqlarda yeni həyatın başlanmasının rəmzidir. Dağıdılmış şəhər və kəndlərin bərpası, insanların doğma yurdlarına qayıdışı, yeni yolların, məktəblərin, müəssisələrin inşası Azərbaycanın gələcəyə inamla baxdığını göstərir. Anım Günü həm keçmişə ehtiram, həm də gələcək qarşısında məsuliyyətdir.

Rüstəm Nağıyev,
YAP Gədəbəy rayon təşkilatının sədri.