
Azərbaycan xalqının tarixində elə hadisələr var ki, onların əhəmiyyəti zaman keçdikcə daha aydın görünür. 2020-ci ilin Vətən müharibəsində qazanılmış tarixi Qələbə də belə hadisələrdəndir. 44 gün davam edən müharibə nəticəsində Azərbaycan Ordusu işğal altında olan torpaqlarımızın böyük hissəsini azad etdi, xalqımızın uzun illər ürəyində yaşatdığı ədalət və torpaq həsrəti arzusu gerçəkləşdi. 8 noyabrda Şuşanın azad edilməsi isə Zəfərimizin rəmzinə çevrildi. Bu Qələbə yalnız hərbi uğur deyil, milli iradənin, birliyin və Vətən sevgisinin təntənəsidir.
Şanlı Zəfərin əbədiləşdirilməsi, ilk növbədə, Vətən uğrunda canından keçən şəhidlərimizin xatirəsinin daim uca tutulması deməkdir. Şəhidlər xalqımızın azadlığı və ərazi bütövlüyü naminə ən böyük fədakarlığı göstərdilər. Onların qəhrəmanlığı gələcək nəsillər üçün mənəvi örnəkdir. Qazilərimizin göstərdiyi şücaət, yaralı döyüşçülərimizin mübarizəsi də bu tarixin ayrılmaz hissəsidir. Şəhid ailələrinə və qazilərə diqqət və qayğı göstərmək, onların fədakarlığını unutmayaraq yaşatmaq hər birimizin mənəvi borcudur.
Zəfər tarixinin yaddaşlarda yaşadılması üçün ölkəmizdə mühüm işlər görülür. Bakıda Zəfər və Hərbi Qənimətlər parklarının yaradılması, paytaxtda Zəfər abidələrinin ucaldılması xalqımızın tarixi hadisəyə verdiyi böyük dəyərin ifadəsidir. Şuşada və işğaldan azad edilmiş digər ərazilərdə keçirilən tədbirlər, bərpa olunan tarixi-mədəni abidələr də qələbəmizin əbədiləşdirilməsinə xidmət edir. Bu məkanlar həm keçmişi xatırladır, həm də gələcək nəsillərə müstəqilliyin və torpaq bütövlüyünün hansı fədakarlıqlar hesabına qorunduğunu göstərir.
Zəfərin əbədiləşdirilməsi yalnız abidələr və xatirə tədbirləri ilə məhdudlaşmır. İşğaldan azad edilmiş ərazilərdə həyata keçirilən genişmiqyaslı quruculuq və bərpa işləri Qələbənin real nəticələrini nümayiş etdirir. Böyük Qayıdış Proqramı çərçivəsində keçmiş məcburi köçkünlərin doğma yurdlarına qayıtması, yeni yaşayış məntəqələrinin salınması, yolların, məktəblərin, xəstəxanaların və digər infrastruktur obyektlərinin tikilməsi azad edilmiş torpaqlarda həyatın yenidən canlanmasını təmin edir. Bu inkişaf ölkəmizin gələcəyə inamla baxdığını və qazanılmış Zəfəri quruculuqla möhkəmləndirdiyini göstərir.
Tarixi Qələbənin gələcək nəsillərə düzgün çatdırılmasında təhsil müəssisələrinin də mühüm rolu vardır. Şagirdlərə Vətən müharibəsinin səbəbləri, gedişi və nəticələri, Azərbaycan əsgərinin qəhrəmanlığı, xalqımızın həmrəyliyi haqqında dolğun məlumat verilməlidir. Tarix dərslərində, məktəb tədbirlərində və anım mərasimlərində şəhidlərimizin həyat yolu və döyüş şücaəti işıqlandırılmalıdır. Gənc nəsil bilməlidir ki, bu Zəfər böyük zəhmət, səbir, birlik və qurbanlar bahasına qazanılıb. Tarixi yaddaşın qorunması milli kimliyimizin və vətənpərvərlik ruhunun möhkəmlənməsinə xidmət edir.
Bu gün 8 Noyabr – Zəfər Günü xalqımızın qürur və iftixar günüdür. Qələbəmizi əbədiləşdirmək onu yalnız xatırlamaq deyil, həm də onun yaratdığı məsuliyyəti dərk etməkdir. Güclü dövlət qurmaq, milli birliyi qorumaq, azad edilmiş torpaqları inkişaf etdirmək və şəhidlərimizin əziz xatirəsinə layiq olmaq bu məsuliyyətin əsas istiqamətləridir. Şanlı Zəfərimiz Azərbaycan tarixinin parlaq səhifəsi kimi daim yaşayacaq, qəhrəmanlarımızın adı və xalqımızın birliyi gələcək nəsillərə örnək olacaqdır.
Rasim Quliyev adına 107 nömrəli tam orta məktəbin tarix müəllimi: Qurban İbişli.
Bölməyə aid digər xəbərlər











Təsisçi və baş redaktor: Eminov Mehman Niftalı oğlu
Tel: 050 577 95 98
Ünvan: Bakı şəhəri, Yasamal rayonu, Mətbuat prospekti, 529-cu məhəllə, Azərbaycan Nəşriyyatı© Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir.