Naxçıvan torpağı Azərbaycanın çoxalmanlı dövlətçilik salnaməsində, milli-mənəvi intibahında və müasir müstəqil dövlət quruculuğu prosesində müstəsna, həlledici və strateji yer tutan müqəddəs bir guşədir. Bu qədim diyar əsrlər boyu özünün zəngin mədəniyyəti, yenilməz müqavimət ruhu, sarsılmaz dövlətçilik ənənələri və coğrafi mövqeyi ilə seçilməklə yanaşı, eyni zamanda Azərbaycan xalqının taleyini köklü şəkildə dəyişən, xalqın mövcudluq mübarizəsinə yön verən dahi şəxsiyyətlər yetişdirmişdir. Bu tarixi şəxsiyyətlər arasında xalqımızın xilaskarlıq missiyasını öz üzərinə götürən, modern Azərbaycan dövlətinin banisi və memarı, Ulu Öndər Heydər Əliyevin adı tariximizə və milli şüurumuza qızıl hərflərlə həkk olunmuşdur. Prezident İlham Əliyevin Naxçıvana növbəti səfəri və bu səfər çərçivəsində Azərbaycan Televiziyasına verdiyi geniş, hərtərəfli və məzmunlu müsahibə də məhz bu tarixi həqiqətin, eləcə də Naxçıvanın dünəni, bu günü və gələcəyinə dair strateji hədəflərin dərindən təhlili baxımından böyük ictimai-siyasi və dövlətçilik əhəmiyyəti kəsb edir. Dövlət başçısının müsahibəsində xüsusi vurğulandığı kimi, Naxçıvanın Azərbaycanın yakın və müasir tarixində oynadığı rol sadəcə bir regionun, muxtar respublikanın çərçivəsi ilə məhdudlaşmır. XX əsrin 90-cı illərinin əvvəllərində — Azərbaycanın müstəqilliyinin itirilməsi təhlükəsinin real xarakter aldığı, ölkənin dərin siyasi, iqtisadi, hərbi böhran və hərc-mənclik içində çabaladığı bir dövrdə — Naxçıvan milli müqavimətin, dövlətçilik təfəkkürünün və xilaskar ideyaların mərkəzinə çevrildi. Məhz Ulu Öndər Heydər Əliyevin Naxçıvandakı fəaliyyəti, onun cəsarətli, prinsipial və uzaqgörən qərarları sayəsində muxtar respublika düşmən təcavüzünə və ağır blokada şəraitinə mərdliklə sinə gərdi, məhv olmaq və işğal olunmaq təhlükəsindən tam qurtuldu.

Heydər Əliyevin rəhbərliyi ilə Naxçıvanda qəbul edilən tarixi qərarlar müasir müstəqil Azərbaycan dövlətinin bərpasının və ideoloji təməllərinin idarəetmə bazasını formalaşdırdı. Azərbaycan Xalq Cümhuriyyətinin üçrəngli bayrağının ilk dəfə məhz Naxçıvan Ali Məclisinin iclasında dövlət rəmzi kimi qəbul edilməsi, Sovet İttifaqının saxlanılmasına dair referenduma qarşı qətiyyətli mövqenin nümayiş etdirilməsi və yeni siyasi sistemin əsasını qoyan Yeni Azərbaycan Partiyasının məhz bu torpaqda təsis olunması dahi rəhbərin xalqın və dövlətin gələcəyinə yönəlmiş analoqsuz siyasətinin bariz sübutudur. Naxçıvan bu mənada müasir Azərbaycanın dövlətçilik xəritəsində sadəcə bir coğrafi məkan deyil, milli intibahın, siyasi iradənin və müstəqillik ideyalarının yenidən alovlandığı başlanğıc nöqtəsidir.

Bütün bu məsələlərə kompleks yanaşdıqda Naxçıvanın strateji əhəmiyyətini bir neçə ana istiqamət üzrə qiymətləndirmək mümkündür. İlk növbədə, siyasi və geosiyasi baxımdan Naxçıvan Azərbaycanın mühüm coğrafiyada yerləşən strateji ərazisidir. Onun Türkiyə və İranla sərhəddə yerləşməsi muxtar respublikaya ölkəmizin regional siyasətində xüsusi çəki qazandırır. İkinci mühüm istiqamət geoiqtisadi və nəqliyyat-kommunikasiya layihələridir. Şərqdən Qərbə uzanan Orta Dəhlizin imkanlarının genişləndirilməsi və fəaliyyətə başlayacaq Zəngəzur dəhlizi Naxçıvanın strateji dəyərini daha da artıracaq. Naxçıvan qədim sivilizasiyaların qovuşduğu, Azərbaycanın zəngin tarixi və mədəni irsinin mühüm hissəsini özündə yaşadan bir məkandır. Bütün bu aspektlər Naxçıvanı ölkəmizin ən güclü, ən önəmli və xüsusi çəkisi olan bölgələrindən birinə çevirir.

Əfləddin Həsənov-Sabunçu bələdiyyəsinin sədri