Cənab Prezident İlham Əliyevin 11 avqust 2026-cı ildə Naxçıvana səfəri zamanı Azərbaycan Televiziyasına verdiyi müsahibədə muxtar respublikanın sosial-iqtisadi inkişafı, enerji təhlükəsizliyi, nəqliyyat infrastrukturu və tarixi-mədəni irsinin qorunması ilə bağlı mühüm məsələlər diqqətə çatdırılıb. Prezident İlham Əliyev bildirib ki, Naxçıvana Prezident kimi 17-ci səfəri də əvvəlki səfərlər kimi mühüm nəticələrlə yadda qalır. Naxçıvanın sürətli və hərtərəfli inkişafının davam etdirilməsi əsas məqsədlərdən biridir.

Səfər çərçivəsində Naxçıvan Sənaye Parkının təməli qoyulub. Burada yeni iş yerlərinin yaradılması və müasir sənaye komplekslərinin formalaşdırılması nəzərdə tutulur. Prezident İlham Əliyev qeyd edib ki, Naxçıvanın inkişafına dair Dövlət Proqramının icrası ilə sosial-iqtisadi sahədə yeni imkanlar yaranacaq, kənd təsərrüfatının inkişafı, suvarma layihələrinin həyata keçirilməsi və müasir infrastrukturun yaradılması istiqamətində işlər sürətləndiriləcək.

Naxçıvanın enerji təhlükəsizliyi də səfərin əsas mövzularından biri olub. Naxçıvan Sənaye Parkının tərkibində 300 meqavat gücündə istilik elektrik stansiyasının inşası planlaşdırılır. Eyni zamanda, 50 meqavat gücündə Günəş elektrik stansiyalarının tikintisi ilə bağlı işlər görülür. Prezident İlham Əliyev Naxçıvanda Günəş enerjisinin istehsalı üçün böyük potensial olduğunu vurğulayıb. Gələcəkdə bərpaolunan enerji mənbələri hesabına elektrik enerjisinin istehsalının artırılması və ixrac imkanlarının genişləndirilməsi nəzərdə tutulur.

Müsahibədə Naxçıvanın nəqliyyat imkanlarının genişləndirilməsi məsələsinə xüsusi yer ayrılıb. Zəngəzur dəhlizinin yaradılması Azərbaycanın əsas hissəsi ilə Naxçıvanı birləşdirəcək mühüm layihə kimi qiymətləndirilib. Horadiz–Ağbənd avtomobil yolunun demək olar ki, hazır olduğu, dəmir yolunun tikintisi və Naxçıvan dəmir yolu infrastrukturunun yenidən qurulması istiqamətində işlərin davam etdiyi bildirilib. Bu layihələrin həyata keçirilməsi Naxçıvanın Şərq-Qərb və Şimal-Cənub nəqliyyat dəhlizlərində rolunu daha da artıracaq.

Prezident İlham Əliyev Naxçıvanın tarixi və mədəni irsinin qorunmasının vacibliyini də vurğulayıb. Naxçıvanın qədim tarixi, zəngin memarlıq irsi və dünya əhəmiyyətli abidələri olduğu qeyd edilib. Möminə xatun məqbərəsinin bərpası, digər tarixi-mədəni obyektlərin konservasiyası və qorunması ilə bağlı işlərin aparılması nəzərdə tutulur. Bu məqamda Naxçıvanın Azərbaycan xalqına Ulu Öndər Heydər Əliyev kimi dahi şəxsiyyət bəxş etdiyi xüsusi vurğulanıb.

Səfər zamanı Naxçıvanın turizm potensialı və sosial infrastrukturu da diqqətdə olub. Şəhərdə yeni beşulduzlu mehmanxananın təməlinin qoyulması, yolların çəkilməsi və əsaslı təmiri, şəhər və rayonlararası nəqliyyatın yaxşılaşdırılması ilə bağlı layihələrdən bəhs edilib. Naxçıvan şəhərində yeni elektrik avtobuslarının istifadəyə verilməsi və rayonlararası nəqliyyat üçün müasir avtobusların alınması da nəzərdə tutulan tədbirlər sırasındadır.

Ümumilikdə, Cənab Prezident İlham Əliyevin Naxçıvana səfəri zamanı səsləndirilən fikirlər göstərir ki, muxtar respublikanın inkişafı kompleks şəkildə davam etdirilir. Sənaye, enerji, nəqliyyat, kənd təsərrüfatı, turizm və sosial infrastruktur sahələrində həyata keçirilən və planlaşdırılan layihələr Naxçıvanın iqtisadi imkanlarının genişləndirilməsinə və regionun strateji əhəmiyyətinin daha da artırılmasına xidmət edir.

Şəhid Müşfiq Orucov adına 213 saylı məktəb-liseyin Azərbaycan dili və ədəbiyyat müəllimi Abbasova Məsumə