20 Yanvar faciəsi Azərbaycan xalqının tarixində qanlı iz buraxmış və milli azadlıq hərəkatının dönüş nöqtəsi olmuşdur. 1990-cı ilin yanvar ayında baş verən bu hadisələr xalqımıza yalnız fiziki itkini yaşatmamış, həm də milli kimlik və şüurun daha da güclənməsinə təkan vermişdir. Həmin dövrdə Azərbaycan vətəndaşlarının azadlıq və müstəqillik arzusu Sovet hakimiyyəti tərəfindən qanlı şəkildə boğulmağa çalışılmışdır. Lakin 20 Yanvar faciəsi xalqımızın birliyini və gücünü daha da dərk etməsinə səbəb olmuş, milli kimliyimizin möhkəmlənməsində tarixi rol oynamışdır.
Bu faciəyə siyasi-hüquqi qiymətin verilməsi isə Ümummilli Lider Heydər Əliyevin təşəbbüsü ilə 1990-cı il noyabrın 21-də Naxçıvan Muxtar Respublikasının Ali Məclisində mümkün olmuşdur. İlk dəfə olaraq qanlı yanvar hadisələri hüquqi müstəvidə qiymətləndirilmiş, Azərbaycanın azadlıq və müstəqillik uğrunda mübarizəsinin haqq və ədalət əsasında olduğunu nümayiş etdirmişdir. Qərarın qəbulu həm milli yaddaşın qorunması, həm də gələcək nəsillərin tarixi düzgün dərk etməsi baxımından önəmli olmuşdur.
Qəbul edilən qərar Sovet hakimiyyətinin Azərbaycan xalqına qarşı həyata keçirdiyi təcavüz və zorakılığı rəsmi şəkildə tanımışdır. Bu siyasi-hüquqi qiymət, faciənin tarixi ədalət əsasında qiymətləndirilməsini təmin etməklə yanaşı, xalqın hüquqlarının müdafiəsi və azadlıq uğrunda mübarizənin hüquqi və mənəvi əsaslarını möhkəmləndirmişdir. Eyni zamanda, bu qərar Azərbaycan cəmiyyətində milli şüurun güclənməsinə və dövlətçilik ideyasının möhkəmlənməsinə əhəmiyyətli töhfə vermişdir.
Ümummilli Lider Heydər Əliyevin təşəbbüsü ilə qəbul edilmiş bu qərar milli həmrəyliyin, vətənpərvərliyin və dövlətçilik ideyasının formalaşmasında mühüm rol oynamışdır. Qərardan sonra 20 Yanvar hadisələri dövlət səviyyəsində tanınmış, faciə xalqın azadlıq və müstəqillik uğrunda mübarizəsinin simvoluna çevrilmişdir. Bu siyasi-hüquqi qiymət həm də gənc nəsillərə milli tarixə hörmət ruhunda tərbiyə verilməsi, vətənpərvərlik və milli kimlik hissinin gücləndirilməsi üçün vacib bir baza yaratmışdır.
Nəticə etibarilə, 20 Yanvar faciəsinə verilən siyasi-hüquqi qiymət yalnız tarixi bir sənəd deyil, həm də Azərbaycan xalqının milli şüurunun möhkəmlənməsi, tarixi ədalətin bərpası və müstəqil dövlətçilik ideyasının inkişafı baxımından əvəzsiz tarixi əhəmiyyətə malikdir. Bu qərar xalqımızın azadlıq uğrunda mübarizəsinin hüquqi və mənəvi tərəflərini möhkəmləndirmiş, Azərbaycan dövlətçiliyinin gələcək inkişafına təkan vermişdir.

Maştağa qəsəbəsi, 108 nömrəli tam orta ümumtəhsil məktəbinin
direktoru Nəriman Məmmədzadə