Müasir dünyada dövlətlərin müstəqilliyi və təhlükəsizliyi yalnız hərbi güc və ya iqtisadi potensialla ölçülmür. Qloballaşma dövründə informasiya psixoloji müharibələrinin, ideoloji təxribatların və xarici təsir mexanizmlərinin kəskinləşdiyi bir vaxtda ideoloji təhlükəsizlik dövlət suverenliyinin ən vacib sütunlarından birinə çevrilmişdir. Azərbaycan Respublikasının Prezidenti, Yeni Azərbaycan Partiyasının Sədri cənab İlham Əliyev öz çıxışlarında ideoloji təhlükəsizlik məsələlərinə hər zaman xüsusi önəm vermiş, bu istiqamətdə dövlətin və cəmiyyətin qarşısında duran əsas prioritetləri dəqiq müəyyənləşdirmişdir.
İdeoloji təhlükəsizliyin özəyini milli-mənəvi dəyərlərin qorunması və Ümummilli Lider Heydər Əliyevin banisi olduğu Azərbaycançılıq məfkurəsi təşkil edir. Ölkə başçısı dəfələrlə vurğulamışdır ki, milli kimliyinə, dilinə, mədəniyyətinə və tarixinə sahib çıxan cəmiyyəti xarici təsirlərlə sarsıtmaq qeyri-mümkündür. Bu baxımdan, Azərbaycançılıq ideologiyası ölkədə yaşayan bütün etnik və dini qrupları vahid məqsəd ətrafında birləşdirən, sosial həmrəyliyi və sabitliyi təmin edən universal modeldir.
Müasir ideoloji mübarizə müstəvisində gənclərin vətənpərvərlik ruhunda tərbiyə olunması xüsusi strateji əhəmiyyət kəsb edir. Xarici ideoloji mərkəzlərin, müxtəlif fondların və transmilli şəbəkələrin gənclərin təfəkkürünə yad dəyərlər aşılamaq cəhdlərinin qarşısının alınması birbaşa ideoloji təhlükəsizlik məsələsidir. 44 günlük Vətən müharibəsində qazanılan tarixi Zəfər göstərdi ki, məhz milli spiritdə, öz tarixinə və torpağına bağlı böyüyən Azərbaycan gəncliyi dövlətin ən böyük güc mənbəyidir. Vətənpərvərlik tərbiyəsi ideoloji təhlükəsizliyin ən etibarlı zəmanətidir.
Bundan əlavə, informasiya təhlükəsizliyi və dezinformasiyalarla mübarizə ideoloji cəbhənin ayrılmaz hissəsidir. Qərəzli informasiya müharibələrinə, beynəlxalq müstəvidə aparılan böhtan kampaniyalarına adekvat cavab verilməsi, Azərbaycan həqiqətlərinin dünya ictimaiyyətinə olduğu kimi çatdırılması böyük zərurətdir. Sosial şəbəkələr və rəqəmsal platformalar vasitəsilə cəmiyyətdə nifaq salmağa yönəlmiş yad ideoloji manipulyasiyaların qarşısı elmi-analitik təhlil, operativ məlumatlandırma və milli maarifləndirmə yolu ilə alınmalıdır.
Yekun olaraq qeyd etmək lazımdır ki, cənab İlham Əliyevin rəhbərliyi ilə həyata keçirilən müstəqil xarici və daxili siyasət Azərbaycanın ideoloji müstəqilliyinin əsas zəminidir. Milli maraqlara söykənən ideoloji təhlükəsizlik xətti ölkəmizin suverenliyinin, cəmiyyətin monolit birliyinin və gələcək davamlı inkişafının sarsılmaz təminatçısıdır.

Elxan Misirxanov adına 71№li tam orta məktəbin ibtidai sinif müəllimi Ülviyyə Xudaverdiyeva.