Azərbaycan Respublikasının Prezidenti, Yeni Azərbaycan Partiyasının Sədri cənab İlham Əliyevin qurultaydakı çıxışı ölkəmizin keçdiyi tarixi yolun təhlili, mövcud beynəlxalq şəraitin qiymətləndirilməsi və qarşıdakı dövrün prioritetlərinin müəyyənləşdirilməsi baxımından diqqəti cəlb edir. Çıxışda Azərbaycanın dövlət müstəqilliyinin möhkəmləndirilməsi, milli təhlükəsizliyin təmin olunması, iqtisadi potensialın artırılması, beynəlxalq tərəfdaşlıq əlaqələrinin inkişafı və ərazi bütövlüyünün bərpasından sonra yaranmış yeni reallıqların qorunması kimi məsələlər ön plana çəkilib
Ulu Öndər Heydər Əliyevin müəyyən etdiyi siyasi kursun əsas prinsipləri müstəqillik, dövlətçilik, iqtisadi müstəqillik və milli maraqların qorunması ilə bağlıdır. Prezident İlham Əliyevin çıxışında da bu prinsiplərin davamlılığına xüsusi diqqət yetirilib. Dövlət siyasətinin ayrı-ayrı istiqamətlərində konkret vəzifələr dəyişə, yeni prioritetlər meydana çıxa bilər. Bununla belə, dövlət müstəqilliyinin qorunması, milli maraqlara əsaslanan qərarların qəbul edilməsi və ölkənin öz imkanlarından səmərəli istifadə etməsi strateji əhəmiyyətini saxlayır.
Prezident İlham Əliyev çıxışında 2027-ci il üçün hərbi və təhlükəsizlik məqsədlərinə təxminən 9 milyard manata yaxın vəsait nəzərdə tutulduğunu bildirib. Bu məsələ müdafiə qabiliyyətinin dövlət siyasətindəki yerini göstərməklə yanaşı, büdcə prioritetləri arasında təhlükəsizliklə digər sosial-iqtisadi ehtiyacların uzlaşdırılmasının vacibliyini də gündəmə gətirir. Dövlətin müdafiə imkanlarının gücləndirilməsi ilə yanaşı, əhalinin sosial rifahının yaxşılaşdırılması, Qarabağ və Şərqi Zəngəzurun bərpası, təhsil və səhiyyənin inkişafı da davamlı dövlət quruculuğunun mühüm istiqamətləridir. Bu sahələr üzrə vəsaitlərin səmərəli istifadəsi və əldə olunan nəticələrin qiymətləndirilməsi dövlət idarəçiliyinin əsas tələblərindəndir.
YAP-ın VIII Qurultayında səsləndirilən fikirlər ölkənin yeni inkişaf mərhələsində dövlət və cəmiyyət qarşısında duran məsələlərin sistemli şəkildə nəzərdən keçirilməsinə imkan verir. Ərazi bütövlüyünün və suverenliyin qorunması, müdafiə potensialının artırılması, iqtisadi imkanların genişləndirilməsi, beynəlxalq tərəfdaşlıqların inkişafı və sosial rifahın yüksəldilməsi qarşılıqlı əlaqədə olan strateji istiqamətlərdir. Bu məqsədlərə nail olunması ardıcıl planlaşdırma, məsuliyyətli idarəçilik, resurslardan səmərəli istifadə və cəmiyyətin fəal iştirakını tələb edir.
Bakı şəhəri 170 nömrəli tam orta ümumtəhsil məktəbinin Azərbaycan dili və ədəbiyyat müəllimi Aygün Abbasova