Prezident Cənab İlham Əliyev 31 iyul 2026-cı ildə Qırğızıstana rəsmi səfər edib. Səfər çərçivəsində hər iki qardaş ölkənin maraqlarını təmin edən məsələlərə toxunulub. Bu səfər Azərbaycan və Qırğızıstan arasındakı münasibətlərin keyfiyyətcə yeni mərhələyə qədəm qoyduğunu bir daha sübut etdi. Səfər çərçivəsində mətbuata verilən bəyanatda səslənən fikirlər və imzalanan sənədlər iki tərəfli əlaqələrin yalnız siyasi müstəvidə deyil, həm də iqtisadi, investisiya və humanitar sahələrdə dərinləşdiyini göstərir.

​İki ölkə arasında dövlətlərarası münasibətlərin əməkdaşlığın en yüksək səviyyəsinə qaldırılması strateji addımdır. Cənab Prezident İlham Əliyevin də qeyd etdiyi kimi:"Müttəfiqlik münasibətləri çox böyük məsuliyyət deməkdir və biz bu məsuliyyətə hazırıq." ​Bu yanaşma tərəflərin həm beynəlxalq platformalarda bir-birinə qarşılıqlı dəstək verməsində, həm də iqtisadi-ticari və təhlükəsizlik sahələrində vahid mövqedən çıxış etməsində özünü aydın büruzə verir.

Səfərin ən mühüm nəticələrindən biri iqtisadi platformada əldə olunan razılaşmalardır. Tərəflər Azərbaycan-Qırğızıstan İnvestisiya Fondunun maliyyə vəsaitini iki dəfə artıraraq 200 milyon dollara çatdırmaq barədə qərar qəbul ediblər.

İqtisadi əməkdaşlığın diqqətəlayiq göstəricilərindən biri də İssık-Kul sahilində Azərbaycan dövlətinin vəsaiti hesabına inşa edilən və ilk beşulduzlu otel kompleksi olan "Bakı" otelinin istifadəyə verilməsidir. Bu addım regional turizm infrastrukturuna töhfə verməklə yanaşı, iki ölkə arasındakı iqtisadi bağların rəmzinə çevrilir.

Eyni zamanda, ticari əlaqələrlə yanaşı Azərbaycan və Qırğızıstan arasında tarixi, mədəni, mənəvi əlaqələr də yüksək səviyyədə inkişaf edib. Buna nümunə olaraq Qarabağın bərpasına töhfə məqsədilə Ağdam rayonunda Qırğızıstanın dəstəyi ilə "Manas" adını daşıyan məktəbin açılışını, Bakıda dahi yazıcı Çingiz Aytmatovun abidəsinin və onun adını daşıyan parkın açılması, eləcə də Bişkekdə Qırğızıstan-Azərbaycan dostluğu parkının fəaliyyət göstərməsini, eləcə də,humanitar sahədə canlı ab-hava yaradaraq cəmiyyətlərin inteqrasiyasını sürətləndirən, qarşılıqlı keçirilən Mədəniyyət Günlərini misal göstərmək olar.

Prezident İlham Əliyevin Qırğızıstana dövlət səfəri göstərdi ki, Azərbaycan-Qırğızıstan münasibətləri artıq sadəcə diplomatik əlaqələr çərçivəsində deyil, tam formalaşmış strateji müttəfiqlik modeli üzərində inkişaf edir. Əldə olunmuş razılaşmalar, artırılan investisiya büdcəsi və birgə humanitar layihələr hər iki dövlətin və xalqın rifahına xidmət edən uzunmüddətli tərəfdaşlığın təminatıdır.

293 saylı tam orta məktəbin ingilis dili müəllimi

Bayramova Türkan