Azərbaycanın xarici siyasətində türk dünyası ilə əməkdaşlığın genişləndirilməsi mühüm istiqamətlərdən biridir. Ulu öndər Heydər Əliyev tərəfindən müəyyən edilmiş siyasi kurs bu gün cənab prezident İlham Əliyev tərəfindən uğurla davam etdirilir. Bu siyasətin nəticəsi olaraq Azərbaycan ilə Qırğızıstan arasında münasibətlər ildən-ilə daha da möhkəmlənir və yeni məzmun qazanır.

Cənab prezident İlham Əliyevin 31 iyul 2026-cı il tarixində Qırğızıstana dövlət səfəri iki ölkə arasında əlaqələrin inkişafında mühüm hadisə oldu. Səfər zamanı keçirilən görüşlər, imzalanan sənədlər və verilən bəyanatlar göstərdi ki, Azərbaycan ilə Qırğızıstan arasında münasibətlər artıq müttəfiqlik səviyyəsinə yüksəlib.

Mətbuata bəyanatında cənab prezident İlham Əliyev qeyd etdi ki, müttəfiqlik münasibətləri böyük məsuliyyət tələb edir və Azərbaycan bu məsuliyyəti bölüşməyə hazırdır. Dövlət başçısı bildirdi ki, ölkələrimiz beynəlxalq təşkilatlarda, iqtisadi layihələrdə, təhlükəsizlik sahəsində və digər istiqamətlərdə bundan sonra da bir-birini dəstəkləyəcək. Bu yanaşma qarşılıqlı etimadın daha da möhkəmlənməsinə xidmət edir.

Səfərin mühüm nəticələrindən biri Azərbaycan–Qırğız İnvestisiya Fondunun vəsaitinin 200 milyon ABŞ dollarına çatdırılması barədə razılığın əldə olunmasıdır. Bu qərar yeni investisiya layihələrinin həyata keçirilməsinə, istehsalın genişlənməsinə və yeni iş yerlərinin yaradılmasına şərait yaradacaq. İssık-Kul gölünün sahilində Azərbaycan dövlətinin vəsaiti hesabına inşa edilən və "Bakı" adını daşıyan beşulduzlu hotelin açılışı da iqtisadi əməkdaşlığın uğurlu nümunələrindən biridir.

Humanitar sahədə görülən işlər də xüsusi əhəmiyyət daşıyır. Ağdam rayonunda "Manas" adını daşıyan məktəbin istifadəyə verilməsi Qırğızıstanın Qarabağın bərpasına verdiyi dəstəyin və qardaşlığın rəmzidir. Bakıda Çingiz Aytmatovun abidəsinin və parkının açılması, Bişkekdə Azərbaycan–Qırğızıstan Dostluq Parkının salınması, qarşılıqlı Mədəniyyət Günlərinin təşkili xalqlarımızın ortaq tarixə, mədəniyyətə və mənəvi dəyərlərə bağlılığını bir daha nümayiş etdirir.

Səfər çərçivəsində cənab prezident İlham Əliyevin Qırğız Respublikasının ali dövlət mükafatı – I dərəcəli "Manas" ordeni ilə təltif olunması, Qırğızıstan Prezidenti Sadır Japarovun isə Azərbaycanın ali dövlət təltifi olan "Heydər Əliyev" ordeni ilə təltif edilməsi ölkələrimiz arasında yüksək etimadın və qarşılıqlı hörmətin göstəricisidir.

Azərbaycanın Mərkəzi Asiya Məşvərət görüşlərinə tamhüquqlu üzv kimi qəbul edilməsi və Çolpon-Ata Bəyannaməsinin imzalanması ölkəmizin beynəlxalq nüfuzunun daha da artdığını göstərir. Bütün bunlar Azərbaycan ilə Mərkəzi Asiya ölkələri arasında əməkdaşlığın yeni mərhələyə qədəm qoyduğunu təsdiqləyir.

Sonda qeyd etmək olar ki, cənab prezident İlham Əliyevin Qırğızıstana dövlət səfəri iki ölkə arasında dostluq və müttəfiqlik münasibətlərinin daha da möhkəmlənməsinə, iqtisadi və humanitar əməkdaşlığın genişlənməsinə, eləcə də türk dünyasının birliyinin güclənməsinə mühüm töhfə verdi. Əldə olunan razılaşmalar gələcəkdə də ölkələrimizin qarşılıqlı inkişafına və xalqlarımızın rifahına xidmət edəcək.

Bakı şəhəri 74 nömrəli tam orta məktəbin ibtidai sinif müəllimi Ağayeva Xəyalə.