Hər bir xalq üçün öz taleyinə sahib olmaq, müstəqil dövlətini yaradaraq inkişaf etdirmək ən böyük nailiyyətdir. Azərbaycan xalqı da tarixinin müxtəlif mərhələlərində işğal, məhrumiyyət və çətinliklərlə üzləşməsinə baxmayaraq, müstəqillik və dövlətçilik əzmini qoruyub saxlamışdır. Bu gün Azərbaycan öz müstəqil dövlətinə sahibdir. Ərazi bütövlüyümüzün və dövlət suverenliyimizin bərpası xalqımızın milli sərvətidir.

Azərbaycan Respublikasında Dövlət Suverenliyi Gününün təsis edilməsi bu tarixi nailiyyətin əhəmiyyətini bir daha vurğulayır. 20 Sentyabr Azərbaycanın dövlətçilik tarixində mühüm gün kimi qeyd olunur. Dövlət suverenliyi ölkənin müstəqil qərar qəbul etməsinin, ərazi bütövlüyünün və dövlət institutlarının davamlı fəaliyyətinin əsasını təşkil edir.

2023-cü ilin sentyabrında həyata keçirilmiş antiterror əməliyyatından sonra Azərbaycanın dövlət suverenliyinin tam bərpa edilməsi ölkənin

tarixində mühüm hadisə olmuşdur. Prezident İlham Əliyev 20 sentyabr 2024-cü ildə Qarabağ Universitetinin müəllim və tələbə heyəti ilə görüşündə Azərbaycanın dövlət suverenliyini tam təmin etdiyini bildirmişdir.

Suverenliyin təmin edilməsi istiqamətində atılan mühüm addımlardan biri Laçın nəzarət-buraxılış məntəqəsinin yaradılması olmuşdur. Bu addım dövlətin öz ərazisində nəzarəti və təhlükəsizliyi təmin etməsi baxımından mühüm əhəmiyyət daşıyır.

Dövlət Suverenliyi Günü Azərbaycanın mövcudluğunun və institusional davamlılığının əsasını təşkil edən dövlət suverenliyinin əhəmiyyətini vurğulayan əlamətdar gündür. Bu gün xalqımızın müstəqilliyə, dövlətçiliyə və öz taleyinə sahib çıxmaq əzmini ifadə edir.

Adı və soyadı: Abbasova Arzu Akif qızı

Məktəb: 81 nömrəli tam orta ümumtəhsil məktəbi

Vəzifəsi: Tarix müəllimi