Azərbaycan Respublikasının xarici siyasəti bütün dövlətlərlə bərabərhüquqlu münasibətlərin qurulmasına, qarşılıqlı hörmətə və faydalı əməkdaşlığa əsaslanır. Ulu öndər Heydər Əliyev tərəfindən əsası qoyulmuş bu strateji siyasi kurs bu gün cənab prezident İlham Əliyev tərəfindən uğurla davam etdirilir. Oktyabrın 13-də Laos Xalq Demokratik Respublikasının Prezidenti Thonglun Sisulitin Azərbaycana səfəri və səfər çərçivəsində keçirilən görüşlər Azərbaycanın beynəlxalq əməkdaşlıq əlaqələrinin genişləndirilməsi istiqamətində atılan mühüm addımlardan biridir.
Azərbaycan ilə Laos arasında münasibətlər dostluq, qarşılıqlı etimad və əməkdaşlıq prinsiplərinə söykənir. Cənab prezident İlham Əliyevin mətbuata verdiyi bəyanatda vurğuladığı kimi, Laos Azərbaycan üçün dost ölkədir. İki dövlət arasında siyasi əlaqələrin uğurla inkişaf etməsi, beynəlxalq təşkilatlar çərçivəsində qarşılıqlı dəstəyin göstərilməsi əməkdaşlığın möhkəm təmələ əsaslandığını nümayiş etdirir.
Səfər çərçivəsində qəbul edilən Azərbaycan ilə Laos arasında Birgə Bəyanat və imzalanan digər sənədlər ikitərəfli əlaqələrin gələcək inkişafı baxımından mühüm əhəmiyyət daşıyır. Bu sənədlər qarşılıqlı əməkdaşlığın əsas istiqamətlərini müəyyənləşdirməklə yanaşı, tərəflər arasında siyasi dialoqun daha da gücləndirilməsinə xidmət edir. Parlamentlərarası əlaqələrin inkişafı və təcrübə mübadiləsinin genişləndirilməsi də iki ölkənin qanunvericilik orqanları arasında münasibətlərin möhkəmlənməsinə şərait yaradır.
İqtisadi və nəqliyyat-logistika sahələrində əməkdaşlıq da xüsusi diqqət çəkən istiqamətlərdəndir. Azərbaycanın əlverişli coğrafi mövqeyi, müasir nəqliyyat infrastrukturu və beynəlxalq nəqliyyat dəhlizlərində iştirakı ölkəmizin regional və qlobal iqtisadi əlaqələrdə rolunu artırır. Bu imkanlardan səmərəli istifadə edilməsi Azərbaycan ilə Laos arasında ticarət dövriyyəsinin genişləndirilməsinə, investisiya əlaqələrinin inkişafına və yeni iqtisadi tərəfdaşlıqların qurulmasına töhfə verə bilər.
Təhsil və humanitar sahələrdə əməkdaşlığın genişləndirilməsi də xalqlar arasında dostluq münasibətlərinin möhkəmləndirilməsi baxımından mühüm əhəmiyyət kəsb edir. Tələbə mübadiləsi, təhsil imkanlarının artırılması və mədəni əlaqələrin inkişafı gənclərin bir-birinin tarixi və mədəniyyəti ilə daha yaxından tanış olmasına şərait yaradır. Bu cür təşəbbüslər uzunmüddətli əməkdaşlığın möhkəm sosial əsaslarının formalaşmasına xidmət edir.
Görüş zamanı müzakirə olunan mühüm məsələlərdən biri də humanitar minatəmizləmə sahəsində əməkdaşlıq olmuşdur. Həm Azərbaycan, həm də Laos mina təhlükəsinin yaratdığı çətinliklərlə üzləşən ölkələr sırasındadır. Bu sahədə təcrübə mübadiləsinin aparılması, müvafiq qurumlar arasında əlaqələrin genişləndirilməsi və beynəlxalq təşəbbüslərin dəstəklənməsi mina probleminin həlli istiqamətində əhəmiyyətli nəticələr verə bilər. Humanitar minatəmizləmə yalnız təhlükəsizliyin təmin olunması deyil, həm də insanların həyatının qorunması və ərazilərin sosial-iqtisadi inkişaf üçün istifadəyə qaytarılması baxımından mühüm əhəmiyyət daşıyır.
Beləliklə, Laos Xalq Demokratik Respublikasının Prezidentinin Azərbaycana səfəri iki ölkə arasında siyasi dialoqun dərinləşdirilməsi, iqtisadi əlaqələrin genişləndirilməsi və humanitar əməkdaşlığın gücləndirilməsi üçün yeni perspektivlər yaradır. Ulu öndər Heydər Əliyev tərəfindən müəyyən edilmiş xarici siyasət ənənələrini uğurla davam etdirən cənab prezident İlham Əliyevin həyata keçirdiyi çoxşaxəli diplomatiya Azərbaycanın beynəlxalq mövqeyinin möhkəmləndirilməsinə və yeni tərəfdaşlıqların qurulmasına xidmət edir. Azərbaycan-Laos münasibətlərinin gələcəkdə daha da inkişaf etməsi qarşılıqlı maraqlara əsaslanan əməkdaşlığın genişlənməsi baxımından mühüm əhəmiyyət daşıyır.
Məqalə müəllifi:
307 nömrəli tam orta məktəbin məktəbdənkənar və sinifdənxaric tərbiyə işləri üzrə təşkilatçısı, tarix müəllimi
Rəsulov Elşən Salman oğlu