Azərbaycan son illərdə iqtisadiyyatının müxtəlif sahələrində mühüm inkişaf yolu keçib. Bu inkişafın əsas istiqamətlərindən biri də qeyri-neft sektorunun gücləndirilməsi və ölkənin təbii sərvətlərindən daha səmərəli istifadə edilməsidir. Bu baxımdan dağ-mədən və metallurgiya sənayesinin inkişafı qarşıdakı illər üçün xüsusi əhəmiyyət daşıyır.
Prezident İlham Əliyevin çıxışında da vurğulandığı kimi, 2027–2030-cu illəri əhatə edən Dövlət Proqramı ölkəmizdə yeni və müasir sənaye istiqamətinin formalaşmasına xidmət edəcək. Bu sahənin inkişafı ilə 5 mindən çox yeni daimi iş yerinin yaradılması nəzərdə tutulur. Bu rəqəmin arxasında isə minlərlə insanın ailəsi, gələcəyi və ölkəmizin müxtəlif bölgələrində yeni iqtisadi imkanların yaranması dayanır.
Azərbaycanın zəngin təbii ehtiyatları ölkəmizin mühüm sərvətlərindəndir. Qızıl, mis və molibden kimi faydalı qazıntı yataqlarının müasir texnologiyalarla araşdırılması və istismara cəlb edilməsi iqtisadiyyatımız üçün yeni imkanlar yarada bilər. Xüsusilə işğaldan azad edilmiş Kəlbəcər, Ağdərə və Zəngilan rayonlarında bu istiqamətdə işlərin aparılması həmin ərazilərin iqtisadi və sosial inkişafına da öz töhfəsini verəcək.
Burada diqqət çəkən məqamlardan biri də Naxçıvan Muxtar Respublikasında geoloji kəşfiyyat işlərinin aparılmasının nəzərdə tutulmasıdır. Müasir texnologiyaların tətbiqi ilə yeni yataqların aşkar edilməsi Azərbaycanın gələcək sənaye potensialının daha da genişlənməsinə şərait yarada bilər.
Dağ-mədən sənayesinin inkişafında dövlətlə yanaşı, özəl sektorun və xarici investorların iştirakı da nəzərdə tutulur. “AzerGold”un bu istiqamətdə fəaliyyəti ilə yanaşı, özəl və xarici investorlara da imkanların yaradılması sahənin daha geniş miqyasda inkişafına xidmət edə bilər. Balakən rayonunda yerləşən “Filizçay” polimetal yatağı da bu baxımdan xüsusi əhəmiyyət daşıyan layihələrdən biridir.
Qərb Sənaye Parkının yaradılması da bu siyasətin mühüm hissəsidir. “Daşkəsən” filiz yatağının istismarı və ətraf bölgələrdə həyata keçiriləcək layihələrlə burada filizin hasilatından son məhsula qədər tam istehsal zəncirinin yaradılması nəzərdə tutulur. Zənginləşdirmə, pelet və briketlənmiş dəmir zavodlarının yaradılması xammalın sadəcə ixrac edilməsindən daha çox, onun ölkə daxilində emal olunaraq əlavə dəyər yaratmasına imkan verə bilər.
Lakin iqtisadi inkişafın yanında daha vacib bir məsələ də var: təbiətin qorunması. Təbii sərvətlərdən istifadə edərkən ətraf mühitə münasibət xüsusi diqqət tələb edir. Çünki yerin altında olan sərvətlər nə qədər qiymətli olsa da, sağlam və gözəl təbiət gələcək nəsillər üçün əvəzolunmaz sərvətdir. Bu səbəbdən sənəddə ekoloji ekspertizanın aparılması və ekoloji normalara əməl olunmasının vacibliyi xüsusi vurğulanır.
Metallurgiya sənayesinin inkişafı da proqramın əsas istiqamətlərindəndir. Alüminium istehsalının 2030-cu ilin sonuna qədər 100 min tona çatdırılması və yeni zavodların yaradılması nəzərdə tutulur. Eyni zamanda, yerli və xarici investorların bu prosesə cəlb olunması üçün imkanların açıq olduğu bildirilir.
Bütün bunlar göstərir ki, dağ-mədən və metallurgiya sənayesinin inkişafı yalnız yeni zavodların tikilməsi və faydalı qazıntıların hasilatı demək deyil. Bu, yeni iş yerləri, bölgələrin inkişafı, ixrac imkanlarının genişlənməsi, dövlət büdcəsinə əlavə gəlirlərin daxil olması və Qarabağla Şərqi Zəngəzurun iqtisadi həyatının daha da canlanması deməkdir. Dövlət Proqramının əsas hədəflərindən biri də məhz bu imkanları uzunmüddətli və sistemli şəkildə həyata keçirməkdir.
Mən bir müəllim kimi düşünürəm ki, ölkənin iqtisadi inkişafı haqqında danışarkən yalnız bu günün nəticələrinə deyil, gələcək nəsillər üçün yaradılan imkanlara da baxmaq lazımdır. Bu gün qurulan zavodlar, yaradılan iş yerləri, inkişaf etdirilən bölgələr və formalaşdırılan yeni sənaye sahələri sabahın Azərbaycanı üçün mühüm təməl ola bilər.
Ən əsası isə odur ki, bütün bu inkişaf insan və təbiət amili ilə birlikdə düşünülməlidir. İqtisadi gücümüz artdıqca təbiətimizi qorumaq, yaradılan imkanlardan insanların rifahı üçün səmərəli istifadə etmək və gələcək nəsillərə daha güclü Azərbaycan miras qoymaq bizim əsas məqsədlərimizdən biri olmalıdır.
69 saylı tam orta məktəbin ibtidai sinif müəllimi:
Qaragözova Kəmalə